Ózbekstan Respublikası Ministrler Kabinetiniń 2024-jıl 8-yanvardaǵı qararı tiykarında Joqarı bilimlendiriw shólkemleri studentleriniń ekonomikalıq tarmaqlardaǵı kárxanalarda haqı tólenetuǵın óndirislik ámeliyatın shólkemlestiriw tártibi haqqındaǵı reje tastıyıqlandı.

Rejege bola, haqı tólenetuǵın óndirislik ámeliyattı shólkemlestiriw maqsetinde Joqarı bilimlendiriw, ilim hám innovaciyalar ministrligi tárepinen studentler arasında hár jılı keminde bir márte tańlaw ótkeriledi.

Bunda ámeliyat ótew ushın 500 (Tashkent qalası ushın – 45, Qaraqalpaqstan Respublikası hám wálayatlar ushın – 35 ten) orın ajıratıladı.

Tańlawda qatnasıw ushın student arzanı jeke ózi, pochta arqalı yamasa elektron tárizde ózi oqıp atırǵan joqarı oqıw ornına tapsıradı.

Tańlawda qatnasıw ushın student:

– pitkeriwshi kursta oqıp atırǵan bolıwı;
– tálim baǵdarı (qánigeligi) tarmaqlıq kárxanadaǵı jumıs baǵdarına sáykes bolıwı;
– Ózbekstan rezidenti bolıwı kerek.

Joqarı bilimlendiriw shólkemi arza tapsırǵan studentler haqqındaǵı maǵlıwmatlardı jollama xatı menen Arnawlı komissiyaǵa 5 jumıs kúninde usınadı.

Arnawlı komissiya usı hújjetlerdi kelip túsken kúnnen baslap 5 jumıs kúni dawamında kórip shıǵıp, studenttiń tańlawda qatnasıwı yamasa onı biykar etiw haqqında qarar qabıllaydı.

Arnawlı komissiya tárepinen studenttiń ámeliyatın shólkemlestiriw is-rejesiniń qorǵalıwı (prezentaciya kórinisinde) ótkerilip, 20 kún ishinde juwmaqlawshı qarar qabıl etiledi.

Juwmaqlawshı qarar qabıl etilgennen 10 jumıs kúni dawamında tańlaw nátiyjeleri boyınsha maǵlıwmat ministrliktiń rásmiy veb-saytında járiyalanadı.

Ámeliyat 1 aydan 3 ayǵa shekemgi bolǵan dáwirde oqıw rejesinde belgilengen múddetlerde ámelge asırıladı.

Studenttiń ámeliyat ótewi ushın sınaq múddeti belgilenbeydi.

Jeńimpaz studentlerdiń ámeliyatı boyınsha qárejetler Arnawlı komissiya tárepinen juwmaqlawshı qarar qabıl etilgennen soń 15 kún dawamında qaplanadı.

Bunda studentke bazalıq esaplaw muǵdarınıń 2 esesi muǵdarında miynet haqı hám oǵan esaplanǵan sociallıq salıq tiyisli esap betine ótkeriledi.

Reje áskeriy hám áskeriylestirilgen joqarı bilimlendiriw shólkemlerine engizilmeydi.

NMPI baspasóz xızmeti.