Student-jaslardıń sabaqtan bos waqıtların mazmunlı ótkeriw maqsetinde Ájiniyaz atındaǵı Nókis mámleketlik pedagogikalıq institutı studentleri arasında jazba saylap alıw, topar, yarım final hám final basqıshlarınan ibarat bolǵan Jeke oyın intellektual turniri shólkemlestirilmekte.

Turnirde bakalavriattıń kúndizgi tálim baǵdarları hám magistratura qánigeliklerinde oqıp atırǵan studentler qatnasıwı múmkin.

Jeke oyın dáslep topar basqıshında qatnasıw ushın jollama beretuǵın jazba saylap alıw menen baslanadı.

Jazba saylap alıwda bir orın ushın birneshe qatnasıwshınıń ochkoları teń kelip qalǵan jaǵdayda bir soraw boyınsha kóplew ochko alǵan qatnasıwshıǵa ústinlik beriledi (máselen, 2 sorawda 20+30 ochko alǵan qatnasıwshıǵa salıstırǵanda bir sorawda 50 ochko alǵan qatnasıwshı ústinlikke iye boladı). Eger bul kórsetkish boyınsha da teńdey nátiyje bolǵan jaǵdayda qarsılasına salıstırǵanda keyingi berilgen sorawdan ochko alǵan qatnasıwshı ústinlikke iye boladı. Eger de teńdey nátiyje minus ochkolarda baqlansa, minus ochkonı sońǵı alǵan qatnasıwshı qarsılasınan tómende turadı. Bul qaǵıyda ochkolar teń kelip qalǵan qálegen basqıshta qollanıladı. Oyında 20 soraw oynaladı.

Jazba saylap alıwda 4 tema oqıladı.

Topar basqıshı 6 toparda ótkeriledi. Hár bir toparda 6 adamnan qatnasadı.

Topar basqıshında toparlarda eń jaqsı nátiyjege erisken 2 bilimdan yarım finalǵa jol aladı.

Topar basqıshı toparlarında 3 temadan oynaladı.

Yarım finalda 12 bilimdan 6 adamnan eki toparǵa bólingen halda qatnasadı. Yarım final toparlarında eń jaqsı kórsetkishke iye eki adamnan hám eń jaqsı kórsetkishke iye bir 3-orın iyesi final jollamasına iye boladı.

Yarım final toparlarında 4 temadan oynaladı.

Final oyınında 5 bilimdan qatnasadı. Finalda 6 tema oynaladı.

Final qatnasıwshılarına juwmaqlawshı nátiyjesine qaray tómendegishe reyting balları beriledi:

1-orın – 10 ball;

2-orın – 8 ball;

3-orın – 6 ball;

4-orın – 4 ball;

5-orın – 2 ball.

Jeke oyınnıń bul qaǵıydaları test rejiminde engizilip atırǵan oyın ushın ámel etedi hám sońınan rásmiy tárizde baslanatuǵın oyın ushın qaǵıydalar qayta kórip shıǵılıwı múmkin.

Turnir 2024-jıldıń fevral, mart, aprel hám may ayları dawamında ótkeriletuǵın ulıwma 9 turdan ibarat boladı. Hár bir tur eki hápteden bir márte, hápteniń shiyshembi kúni saat 16:00 de instituttıń úlken májilisler zalında ótkeriledi.

Turnirdiń final oyını 2024-jıl 29-may kúni saltanatlı tárizde ótkeriledi.

Turnirde eń joqarı ballǵa iye bolǵan 3 qatnasıwshı sáykes túrde 1-, 2- hám 3-orınlardı iyelegen bolıp tabıladı.

Ballar teń bolıp qalǵan jaǵdayda qosımsha sorawlar oynaladı hám sol arqalı 1-, 2- jáne 3-orın iyeleri anıqlanadı.

Turnir juwmaǵında 1-orındı iyelegen jeńimpaz qatnasıwshı bazalıq stipendiya muǵdarınıń 2 (eki) esesi, 2- hám 3-orınlardı iyelegen qatnasıwshılar bazalıq stipendiya muǵdarınıń 1 (bir) esesi muǵdarında sıylıqlanadı.

Maǵlıwmat ornında atap ótiw kerek, Jeke oyın intellektual turniriniń 1-tur oyını 2024-jıldıń 30-yanvar kúni saat 16:00 de instituttıń úlken májilisler zalında ótkeriledi. Qatnasıwdı qálewshi studentler fakultet dekanlarınıń jaslar máseleleri boyınsha orınbasarlarına múrájat etiwi kerek.

NMPI baspasóz xızmeti.