Student-jaslardıń sabaqtan bos waqıtların mazmunlı ótkeriw maqsetinde Ájiniyaz atındaǵı Nókis mámleketlik pedagogikalıq institutı studentleri arasında jazba saylap alıw, topar, yarım final hám final basqıshlarınan ibarat bolǵan «Erudit kvartet» intellektual turniri shólkemlestirilmekte.

Turnirde bakalavriattıń kúndizgi tálim baǵdarları hám magistratura qánigeliklerinde oqıp atırǵan studentler qatnasıwı múmkin.

Turnir dáslep topar basqıshında qatnasıw ushın jollama beretuǵın jazba saylap alıw menen baslanadı.

«Erudit kvartet» oyını – individual esapqa tiykarlanǵan komandalıq jarıs bolıp, qatnasıwshılar belgilengen waqıt ishinde logikalıq sorawlarǵa tezlik penen juwap beriw boyınsha jarısadı. Qatnasıwshılardıń maqseti – oyın dawamında qarsılas komanda qatnasıwshılarına qaraǵanda kóbirek ball jıynawdan ibarat.

Oyın dawamında hár bir komandada 4 qatnasıwshı (rezerv 2, jámi 6 qatnasıwshı)dan qatnasıwı kerek.

Turnir tómendegi úsh basqıshtan ibarat: jazba túrde saylap alıw, topar basqıshı hám final.

Jazba túrde saylap alıwda komandanıń bir oyınshısı qatnasadı. Turnirdiń saylap alıw basqıshında 8 temaǵa baylanıslı besewden – ulıwma 40 soraw beriledi. Hár bir durıs juwap ushın sorawǵa aldın ala belgilengen (10/20/30/40/50) ball beriledi. Hár bir nadurıs juwap ushın bolsa, sorawǵa aldın ala belgilengen balldıń (-10/-20/-30/-40/-50) keri mánisi jazıladı. Sorawǵa juwap berilmegen jaǵdayda sol sorawǵa ball berilmeydi. Tańlap alıw nátiyjelerine bola 50 komandalar toplaǵan balları mánisine uyqas túrde toparlarǵa bólinedi.

Eger komandalar jazba túrde saylap alıw nátiyjeleri boyınsha teń muǵdardaǵı ball toplasa, eń úlken nominal baha ushın durıs juwaplardı bergen komanda ústemlikke iye boladı. Qayta teńlik jaǵdayında keyingi nominal baha menen alınǵan sorawlar sanı esapqa alınadı hám sol tártipte dawam etedi.

Topar basqıshınıń jazba túrde saylap alıw nátiyjelerine bola 5 komandadan ibarat 2 (A, B) toparǵa ajıratıladı. Turnirdiń topar basqıshında hár bir toparǵa 12 tema boyınsha besewden – ulıwma 60 tematikalıq soraw beriledi. Toparda birinshi hám ekinshi orındı alǵan komandalar hám eki toparda eń jaqsı kórsetkishke iye úshinshi orındı iyelegen komanda – ulıwma 5 komanda finalǵa jol aladı.

Turnirdiń final basqıshında 12 tema boyınsha besewden – ulıwma 60 tematikalıq soraw beriledi.

Finalda eń kóp ball toplaǵan komandalar esabına qaray birinshi, ekinshi hám úshinshi, orındı aladı.

Final basqıshınan soń, keyingi basqıshqa ótiw ushın birneshe komanda teń ball toplasa, teń ball toplaǵan komandalardıń bir wákilleri arasında 1 temadan qosımsha jarıs shólkemlestiriledi hám bul jarıs nátiyjesine muwapıq komandanıń turnirde iyelegen ornı belgilenedi. Eger de qosımsha temada da ballar teń bolıp qalsa, basqa temada birinshi plyus yamasa minus bahalı ball alınǵanǵa shekem sorawlardı mánisi keri tártipte (50 ballı sorawdan baslap 10 ballı sorawǵa shekem) oqıp, dawam ettiriledi.

Final qatnasıwshılarına juwmaqlawshı nátiyjesine qaray tómendegishe reyting balları beriledi:

1-orın – 10 ball;

2-orın – 8 ball;

3-orın – 6 ball;

4-orın – 4 ball;

5-orın – 2 ball.

Turnirdiń topar, shereklik, yarım final hám final basqıshı oyınları arnawlı elektron qurılma járdeminde alıp barıladı. Qurılma turnir qatnasıwshıları túymesheni basqan waqtın anıqlaydı.

Baslawshı sorawdı oqıp bolǵannan soń, onıń járdemshisi qurılmanıń start túymesin basadı. Qatnasıwshılar qurılmanıń dawıs signalınan keyin berilgen túymesheni basıwı kerek. Eger qatnasıwshı dawıs signalına shekem túymesheni basıp jiberse, baslawshı soraw oqılıwınan toqtaydı hám túymeni basqan qatnasıwshı juwap beredi. Túymesheni qalǵan qatnasıwshılarǵa salıstırǵanda birinshi bolıp basqan qatnasıwshı birinshi bolıp juwap beriw múmkinshiligine iye boladı. Eger qatnasıwshılar 7 sekund waqıt ishinde túymesheni baspasa, ball berilmeydi. Eger birinshi bolıp juwap beriw huqıqına iye bolǵan qatnasıwshı nadurıs juwap berse, qalǵan qatnasıwshılarǵa túymesheni basıp juwap beriwi ushın 5 sekundtan waqıt beriledi. Bir sorawǵa kóbi menen 3 komanda juwap beriwi múmkin.

Bilimdan túymesheni basqannan soń baslawshı yamasa onıń járdemshisi qaysı qatnasıwshı juwap beriw múmkinshiligine iye ekenligin járiyalawı shárt. Bunnan keyin juwap berip atırǵan qatnasıwshı óz versiyasın aytıwı zárúr. Juwap beriw múmkinshiligi berilgen payıt penen qatnasıwshı juwaptı beriwdi baslawı arasındaǵı tánepis 3 sekundtan asıp ketpewi zárúr. Eger sol waqıt ishinde juwap berilmese, qatnasıwshı nadurıs juwap bergen boladı.

Juwaptıń durıs yamasa nadurıslıǵın tek baslawshı anıqlaydı. Baslawshınıń sheshimi qatań boladı hám heshqanday shaǵımlar qabıl etilmeydi.

Hár bir soraw oqılıwınan aldın, baslawshı sorawdıń mánisin daǵazalawı zárúr. Berilgen juwap durıs bolǵan jaǵdayda baslawshı «Juwap durıs» dep aytadı (eger zárúrlik bolsa ózindegi durıs juwap tekstin oqıydı), bilimdanǵa berilgen balldı járiyalaydı hám náwbettegi sorawdı oqıwǵa ótedi. Berilgen juwap nadurıs bolǵan jaǵdayda baslawshı «Juwap nadurıs» dep málim etedi, qatnasıwshı iye bolǵan balldı aytadı.

Birneshe bólekten ibarat juwaptıń bir bólegi nadurıs bolsa da, qatnasıwshınıń juwabı nadurıs dep esaplanadı.

Qatnasıwshı bergen juwapqa baslawshı tárepinen anıqlastırıw soralmaydı, sonıń menen birge, bilimdan berip bolǵan juwabına qosımsha kirdize almaydı.

Topar basqıshı hám final oyınları 3 turdan ibarat boladı:

1-tur – «ashıq tur» dep ataladı hám turnirdiń barlıq tema atları baslawshı tárepinen 1 tur aldınan daǵaza etiledi hám komanda qaysı qatnasıwshı qaysı temada oynawı kerekligin belgileydi hám tema daǵaza etilgennen soń, temaǵa saylanǵan qatnasıwshı komanda ushın belgilengen túyme aldına otıradı;

2-tur – «yarım ashıq tur» dep ataladı hám tema oqılıwınan aldın, tek ǵana sol tema atı baslawshı tárepinen daǵaza etiledi hám komanda qaysı qatnasıwshı daǵaza etilgen temada oynawın tańlaydı hám saylanǵan qatnasıwshı komanda ushın belgilengen túyme aldına otıradı;

3-tur – «jabıq tur» dep ataladı hám tema atları daǵaza etilmeydi hám qatnasıwshılar gezekpe-gezek komanda ushın belgilengen túyme aldına otıradı.

Hár bir basqıshtaǵı ashıq, yarım-ashıq hám jabıq turlarda komandanıń hár bir qatnasıwshısı hár bir temada bir márte (5 soraw) qatnasa aladı, solayınsha hár bir turda komandanıń hár bir qatnasıwshısı qatnasıwı támiyinlenedi. Rezerv oyınshılardı basqıshtaǵı turlar arasında tiykarǵı quramǵa tartıw múmkin. 

Turnir 2024-jıldıń fevral, mart, aprel hám may ayları dawamında ótkeriletuǵın ulıwma 9 turdan ibarat boladı. Hár bir tur eki hápteden bir márte, hápteniń sárshembi kúni saat 16:00 de instituttıń úlken májilisler zalında ótkeriledi.

Turnirdiń final oyını 2024-jıl 4-iyun kúni saltanatlı tárizde ótkeriledi.

Tańlawda eń joqarı balldı iyelegen 3 qatnasıwshı 1-, 2- hám 3-orınlardı iyelegen bolıp tabıladı.

Final oyınınan keyin ballar teń bolıp qalǵan jaǵdayda qosımsha sorawlar oynaladı hám sol arqalı 1-, 2- hám 3-orın iyeleri anıqlanadı.

Tańlaw juwmaǵında jeńimpaz komanda, yaǵnıy 1-orındı iyelegen komanda aǵzasınıń hár biri bazalıq stipendiya muǵdarınıń 2 (eki) esesi, 2- hám 3- orındı iyelegen komandalardıń hár bir aǵzası bazalıq stipendiya muǵdarınıń 1 (bir) esesi muǵdarında sıylıqlanadı.

Maǵlıwmat ornında atap ótiw kerek, «Erudit kvartet» turniriniń 1-tur oyını 2024-jıldıń 31-yanvar kúni saat 16:00 de instituttıń úlken májilisler zalında ótkeriledi. Qatnasıwdı qálewshi studentler fakultet dekanlarınıń jaslar máseleleri boyınsha orınbasarlarına múrájat etiwi kerek.

NMPI baspasóz xızmeti.