Ájiniyaz atındaǵı Nókis mámleketlik pedagogikalıq institutında 2023-jıl dawamında ilimiy-izertlew jumısların jetilistiriw hám innovaciyalıq joybarlardı ámeliyatqa engiziw baǵdarında islengen jumıslardıń nátiyjelerin dodalaw, sonday-aq, xalıqaralıq hám milliy reytinglerde instituttıń kórsetkishlerin joqarılatıw máselelerine arnalǵan ashıq sáwbetlesiw hám seminar shólkemlestirildi.

Ilajda instituttıń ilimiy isler hám innovaciyalar boyınsha prorektorı Roxat Eshmuratov ótken jıldaǵı qolǵa kirgizilgen tabıslar hám nátiyjeler haqqında maǵlıwmat berdi.

Búgingi kúnde institutta 579 professor-oqıtıwshı jumıs alıp barıp atırǵan bolıp, sonnan 26 ilim doktorı, 200 ilim kandidatı hám filosofiya doktorları jaslarǵa bilim berip kelmekte. Olar arasınan 2023-jıl dawamında 3 ilim doktorı (DSc) hám 27 filosofiya doktorı (PhD) ózleriniń ilimiy jumısların qorǵap shıǵıp, instituttıń ilimiy dárejelilik kórsetkishiniń 39 procentke jetiwin támiyinledi. Sonıń menen birge, institutta 122 tayanısh doktorant hám 2 doktorant oqıp atırǵan bolıp, olar ózleriniń ilimiy-izertlew jumısların dawam ettirmekte.

Professor-oqıtıwshılar tárepinen 21 monografiya baspadan shıǵarılıp, xalıqaralıq jurnallarda 347 maqala járiyalanǵan bolsa, sonnan «Scopus» hám «Web of Science» bazalarında indeksaciyalanǵan jurnallarda 86, respublikalıq ilimiy jurnallarda bolsa 350 ilimiy maqalalar járiyalandı.

Ótken jıl dawamında institutta ulıwma 9 xalıqaralıq hám 9 respublikalıq konferenciya shólkemlestirildi. Usı konferenciya toplamlarında 1 100 ge shamalas ilimiy tezisler basıp shıǵarıldı.

2023-jıl dawamında institutta «Araldıń qurıǵan jerlerinde tábiyiy sharayatta hám introdukciyalanatuǵın Cinoglossum viridiflorum Pall. ex. Lexm. hám Malacocarpus crithmifolius (Retz) C.A..Mey.diń agrotexnikası» atamasındaǵı 963 million sumlıq ámeliy-innovaciyalıq joybarı orınlandı. Sonıń menen birge, bahası 1,7 million sumlıq 2 xojalıq shártnaması ámelge asırıldı.

2023-2024-oqıw jılı ushın instituttıń 15 studenti Ózbekstan Respublikası Prezidenti hám ataqlı mámleketlik stipendiyalar tańlawlarınıń jeńimpazı, sonday-aq, 13 student instituttıń Ájiniyaz Qosıbay ulı atındaǵı stipendiya tańlawı jeńimpazı boldı.

Qábiletli, ziyrek studentlerdi anıqlaw, olardıń baslamaların qollap-quwatlaw hám xoshametlew maqsetinde «Jaslar akademiyası forumı», «Meniń startap joybarım», «TOP 10 Innovator», «Ideaton-2030 Uzbekistan» «Texnoways» sıyaqlı tańlawlar, sonıń menen birge, onlayn pán olimpiadaları ótkerildi.

2023-jıldıń oktyabr ayında Nókis qalasında joqarı oqıw orınları studentleri arasında matematika boyınsha Muhammed ál-Xorezmiy atındaǵı II Xalıqaralıq olimpiadasında bir student 3-orındı iyelegen bolsa, instituttıń jáne bir studenti Sibir matematika olimpiadasında 3-orındı iyeledi. Qaraqalpaqstan Respublikası Mektepke shekemgi hám mektep bilimlendiriwi ministrligi menen birgelikte ulıwma bilim beriw mektepleriniń pitkeriwshi klass oqıwshıları arasında ximiya-biologiya pánlerinen kóp basqıshlı olimpiadası shólkemlestirildi.

Institutta bilimlendiriwdiń sapasın arttırıw, kadrlar tayarlawdıń jańa usılların engiziw maqsetinde xalıqaralıq abıraylı joqarı oqıw orınları hám ilimiy-izertlew orayları menen nátiyjeli baylanıslar ornatıldı.

Búgingi kúnde dúnyanıń «TOP-1000»lıq dizimine kiretuǵın 62 joqarı oqıw ornı menen shártnama hám memorandumlar dúzilgen bolıp, sonnan 15 joqarı oqıw ornı QS (Quacquarelli Symonds World University Ranks), THE (Times Higher Education) hám ARWU (The Academic Ranking of World Universities) xalıqaralıq reytinglerinen orın alǵan.

Usı shártnamalar tiykarında ótken jıl dawamında instituttıń 50 den aslam professor-oqıtıwshıları sırt ellerdegi joqarı oqıw orınları hám ilimiy-izertlew oraylarına qánigeligin jetilistiriw, seminar ótiw, ilimiy koncerenciyalarda qatnasıw, lekciya oqıw hám ilimiy stajirovkalarǵa jiberilgen bolsa, dúnyanıń «TOP-1000»lıq dizimine kiretuǵın joqarı oqıw orınlarınan 14 professor-oqıtıwshı hám qánigeler instituttıń ilimiy-pedagogikalıq jumıslarına shaqırıldı.

Jolǵa qoyılǵan xalıqaralıq baylanıslar nátiyjesinde ótken jıldıńmay ayında institutta dúnyanıń 10 ǵa shamalas mámleketleriniń abıraylı joqarı oqıw orınları, ilimiy orayları wákilleri qatnasıwında «Zamanagóy talaplar sharayatında pedagogikalıq bilimlendiriw sapasın arttırıw» atamasındaǵı «IFTE-2023: Uzbekistan» xalıqaralıq konferenciyası, sonday-aq, Rossiya hám Qazaqstan mámleketlerinen kelgen 10 ǵa shamalas professorlar, arxeolog ilimpazlar qatnasıwında Nókis rayonı aymaǵındaǵı Kerder mádeniyatına tiyisli Haywanqala arxeologiyalıq kompleksinde xalıqaralıq-arxeologiyalıq ilimiy ekspediciya ámelge asırıldı.

Ilajda, sonday-aq, instituttıń xalıqaralıq hám milliy reytinglerdegi kórsetkishlerin jaqsılaw baǵdarında ámelge asırılıwı zárúr bolǵan jumıslar haqqında fizikanı oqıtıw metodikası kafedrasınıń professorı, fizika-matematika ilimleriniń doktorı Bahram Yavidov, anıq hám tábiyiy pánlerdi aralıqtan oqıtıw kafedrasınıń baslıǵı Polatbek Kalxanovlar tárepinen seminar ótkerildi.

NMPI baspasóz xızmeti.