Ájiniyaz atındaǵı Nókis mámleketlik pedagogikalıq institutında jaslar arasında náshebentlik, psixotrop zatlardan paydalanıwdıń aldın alıw hám quramında kúshli tásir etiwshi elementler bolǵan dári preparatlarınıń nızamǵa qayshı aylanısına qarsı gúresiwdi úgit-násiyatlaw boyınsha taraw wákilleri menen ushırasıw bolıp ótti.

Ilajda Ózbekstan Respublikası Ishki isler ministrligi Operativ-izlew departamenti Jınayat-izlew xızmeti basqarma baslıǵınıń orınbasarı A.Matlyubov, usı basqarmanıń juwapker xızmetkerleri, sonday-aq, Qaraqalpaqstan Respublikası Ishki isler ministrligi Jınayat-izlew basqarması baslıǵınıń orınbasarı N.Abdullaev jaslar menen sáwbetlesiw ótkerdi.

Taraw wákilleri tárepinen atap ótilgenindey, elimizde jınayatshılıqqa qarsı gúresiw hám huqıqbuzarlıqlardıń aldın alıw baǵdarındaǵı jumıslardı muwapıqlastırıw, xalıqtıń huqıqıy mádeniyatı hám sanasın jetilistiriw, bul baǵdarda mámleketlik strukturalardıń bilimlendiriw mákemeleri, puqaralıq jámiyetiniń institutları, ǵalaba xabar quralları menen óz ara nátiyjeli birge islesiwin shólkemlestiriw menen baylanıslı anıq wazıypalar belgilengen bolıp, Jınayat kodeksiniń 270-276-statyaları menen náshebentlik zatlar, olardıń analogları hám psixotrop zatlardı nızamǵa qayshı túrde paydalanıw ushın jınayıy juwapkershilik belgilengen. BMShnıń maǵlıwmatlarına bola, náshebentlik awır hám oǵada awır jınayatlardıń júz beriwine, shańaraqlar hám millet genofondınıń buzılıwına sebepshi bolmaqta.

Sońǵı jıllarda náshebentlik hám psixotrop zatlardan paydalanıw kórsetkishleriniń jaslar arasında artıp baratırǵanlıǵı bul baǵdardaǵı profilaktikalıq jumıslardıń nátiyjeliligin arttırıwdı talap etpekte. 2022-jıl jaslar qatnasıwında náshebentlik hám psixotrop zatlar menen baylanıslı 82 jınayat anıqlanǵan bolsa, 2023-jılda bul kórsetkish 97 ge jetkenligi jaslar tárbiyası ushın juwapker bolǵan taraw xızmetkerlerin, ulıwma keleshegimizge biyparıq bolmaǵan hár kimdi tereń oyǵa saladı.

Ilajda qánigeler jaslardıń pikir-usınısların tıńlap, sorawlarına juwap berdi.

Ilaj sońında náshebentlik hám psixotrop zatlardıń unamsız aqıbetleri haqqında sóz etetuǵın videorolik studentlerdiń názerine usınıldı.

NMPI baspasóz xızmeti.