Aral teńiziniń qurıǵan ultanında 2018-jıldıń dekabr ayınan baslanǵan «jasıl qaplamalar» qorǵanıw toǵaylıqların payda etiw jumısları nátiyjesinde usı kúnge shekem 1 million 730 mıń gektar jerde toǵaylıq jaratıldı.

Teńizdiń suwı tartılǵan túbinde seksewil, qandım, qarabaraq, jıńǵıl hám basqa da shólge shıdamlı, átiraptaǵı duzlı qumlardıń hawaǵa kóteriliwiniń aldın alıwǵa xızmet etetuǵın ósimliklerdi egiw jumıslarına Ájiniyaz atındaǵı Nókis mámleketlik pedagogikalıq institutınıń miynet jámááti hám student-jasları da óz úleslerin qosıp kelmekte.

Jasıl toǵaylıqlar payda etiw boyınsha 2024-jılǵı jumıslar «Mehir Araldı qutqaradı» súreni tiykarında baslap jiberilip, oǵan elimizdiń belsendi jasları qatarında institutımızdıń studentleri de óz qol kómegin berip qayttı.

Xalqımız arasında «nolinshi noqat» dep atalatuǵın orında ótkerilgen shólge shıdamlı ósimlik nállerin otırǵızıw hám tuqımnan egiw jumıslarına belsene qatnastı.

NMPI baspasóz xızmeti.