Ájiniyaz atındaǵı Nókis mámleketlik pedagogikalıq institutı hám Nókis qalalıq 6-sanlı ulıwma bilim beriw mektebi menen birge islesiw shártnaması tiykarında Tariyx fakulteti milliy ideya, ruwxıylıq tiykarları hám huqıq tálimi kafedrası tárepinen usı mekteptiń 11-klass oqıwshıları ushın kásipke baǵdarlawǵa qaratılǵan ushırasıw ótkerildi.

Ushırasıw barısında mektep oqıwshıları fakultette studentler ushın jaratılǵan sharayatlar menen tanıstı, fakultet hám milliy ideya, ruwxıylıq tiykarları hám huqıq tálimi kafedrası turmısı haqqında maǵlıwmatlar aldı. Dekan orınbasarı D.Reymov tárepinen studentlerdiń bos waqtın mazmunlı ótkeriwi ushın ámelge asırılıp atırǵan ilajlar tuwralı maǵlıwmatlar berildi.

Ushırasıw baǵdarlaması sheńberinde mektep oqıwshıları fakultet qasında shólkemlestirilgen arxeologiyalıq muzey eksponatları menen tanıstı hám úlkemiz tariyxına baylanıslı ózlerin qızıqtırǵan sorawlarǵa juwap aldı.

Ushırasıwdan kafedra professor-oqıtıwshıları hám fakultet dekanatı wákilleri menen sáwbet te orın alıp, onda kafedra professor-oqıtıwshıları Sh.Tanimov, I.Jaksimov, A.Muratbaeva hám dekan orınbasarı N.Jumageldiev pedagogika tarawına mámleketimiz tárepinen qaratılıp atırǵan itibar, pedagog kásibiniń mártebesi tuwralı maǵlıwmatlar berdi.

Mektep oqıwshıları fakultet qasındaǵı akademik J.Bazarbaev muzeyinde boldı. Bul jerde olar milliy ideya, ruwxıylıq tiykarları hám huqıq tálimi baǵdarı 1-kurs studentleri, kafedra professor-oqıtıwshıları, akademiktiń perzenti, tariyx ilimleriniń doktorı R.Bazarbaev penen tanıstı. Akademik J.Bazarbaevtıń shákirti, filosofiya ilimleri kandidatı A.Muratbaeva ustazınıń órnekli ómir jolı, ilimiy, jámiyetlik-siyasiy iskerligi tuwralı keń túrde aytıp berdi, bul mektep oqıwshılarınıń ózleri ushın keleshek ómirlerine, iskerligine úlgi jaratıwına unamlı tásir kórsetti.

Ushırasıw barısında mektep oqıwshılarına akademik J.Bazarbaev hám kafedra professor-oqıtıwshıları tárepinen jazılǵan kitaplar sawǵa etildi.