Búgin, 23-fevral kúni Ájiniyaz atındaǵı Nókis mámleketlik pedagogikalıq institutında «Ózbekstan – ulıwma úyimiz» atamasındaǵı festival bolıp ótti.

Festival sheńberinde mámleketimizde jumıs alıp barıp atırǵan milliy-mádeniy oraylar, sonday-aq, institutta oqıp, bilim alıp atırǵan túrli millet wákilleri, sheber studentler tárepinen islengen milliy kiyimler, qol óneri úlgileri, súwretler kórgizbeleri shólkemlestirildi.

Ilajǵa Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı Tatlımurat Atamuratov, Ózbekstan Respublikası Din isleri boyınsha komiteti Qaraqalpaqstan Respublikası aymaqlıq basqarması, sonday-aq, milliy-mádeniy oraylardıń basshıları, aǵartıwshı ziyalılar, ilimpazlar, professor-oqıtıwshılar hám student-jaslar qatnastı.

Búgingi kúnde elimizde bir júz otızdan aslam millet hám xalıqlardıń wákilleri bir shańaraqtıń perzentlerindey tatıwlıqta, awızbirshilikte jasap, túrli tarawlarda nátiyjeli miynet etpekte. Barlıq millet hám xalıqlardıń tili, mádeniyatı, úrp-ádet hám dástúrlerin saqlaw jáne rawajlandırıw ushın barlıq sharayatlar jaratılǵan. Mámleketimiz tárepinen hár qıylı milletler arasında óz ara miyrim-shápáátti bunnan bılay da bekkemlewge ayrıqsha itibar qaratılmaqta.

– Óziniń 90 jıllıq tariyxına iye bolǵan Nókis mámleketlik pedagogikalıq institutında házirgi waqıtta 18 mıńǵa shamalas studentler bilim almaqta. Bilimlendiriw 5 tilde alıp barılatuǵın bul ullı dárgayda qaraqalpaq, ózbek, qazaq, túrkmen, rus, koreys, qırǵız, ázerbayjan, bashqurt, uyǵır hám tatar sıyaqlı ulıwma 11 milletke tiyisli studentler bir shańaraqtıń perzentlerindey, awızbirshilikte oqıp atır. Olar tek ǵana institutta emes, sonıń menen birge, respublikamız kóleminde ótkerilip kiyatırǵan ulıwma xalıqlıq ilajlarda da tatıwlıq penen birgelikte qatnasıp, úlken nátiyjelerdi qolǵa kirgizip kelmekte. Bunıń ózi tikkeley Ǵárezsizligimizdiń kóp milletli xalqımızǵa bergen ullı jemisi dep esaplaymız, – dep atap ótti institut rektorı wazıypasın waqıtsha atqarıwshısı Quvondiq Qodirov óz bayanatında.

Ilajda ilimiy-pedagogikalıq jumıslar menen birge, ruwxıy-aǵartıwshılıq isleri, ásirese, jaslar tálim-tárbiyasında ayrıqsha belsendilik kórsetip kiyatırǵan institut jámáátine Ózbekstan Respublikası Din isleri boyınsha komiteti Qaraqalpaqstan Respublikası aymaqlıq basqarması tárepinen húrmet jarlıǵı hám sawǵalar tapsırıldı.

Festival sheńberinde instituttıń «Tumaris» xalıq ansambli hám talantlı studentleriniń atqarıwındaǵı túrli millet wákilleriniń qosıqları, ayaq-oyınlarınan ibarat koncert baǵdarlaması jıynalǵanlar itibarına usınıldı.

NMPI baspasóz xızmeti.