Ájiniyaz atındaǵı Nókis mámleketlik pedagogikalıq institutı sport klubı baslıǵınıń orınbasarı, Qaraqalpaqstan Respublikası Xalıq bilimlendiriw aǵlası, bilimlendiriw hám sport tarawınıń jankúyer pidayısı Erejepov Atabay Jumabaevich 65 jasında mezgilsiz qaytıs boldı.

Atabay Erejepov 1959-jıl 23-mart kúni Shımbay rayonında dúnyaǵa kelgen. Ol 1985-jılı sol waqıttaǵı Nókis mámleketlik universitetiniń dene tárbiyası qánigeligin pitkerip, dáslepki miynet jolın ózi tuwılıp ósken Shımbay rayonındaǵı mektepte muǵallim bolıwdan baslaǵan bolsa, keyin ala mektep direktorlıǵı, rayonlıq kásiplik awqamı komiteti xatkeri sıyaqlı juwapkerli lawazımlarda miynet etken.

Ol Ájiniyaz atındaǵı Nókis mámleketlik pedagogikalıq institutında 2002-jıldan usı kúnge shekem Dene mádeniyatı fakultetinde assistent-oqıtıwshılıqtan baslap kafedra baslıǵı, sońınan institut sport klubı baslıǵınıń orınbasarı sıyaqlı lawazımlardı ádiwli túrde atqardı.

Óziniń kóp jıllıq miynet jolı dawamında elimizde sporttıń ǵalabalıǵına erisiw, úmitli sportshılardı tayarlap shıǵarıw, bilimlendiriw tarawın jetik kadrlar menen támiyinlewdey joqarı dárejedegi jumıslardı ámelge asırıwǵa xızmet etti. Onıń kóplegen shákirtleri respublikalıq hám xalıqaralıq dárejedegi sport jarıslarında jeńimpaz bolıp, mámleketimizdiń bayraǵın kóklerde jelbiretiwge úles qospaqta.

Ájiniyaz atındaǵı Nókis mámleketlik pedagogikalıq institutı rektoratı hám miynet jámááti, sonday-aq, jámiyetlik shólkemleri atınan marhumnıń shańaraq aǵzaları, tuwǵan-tuwısqanları, jaqınları hám shákirtlerine tereń qayǵırıw menen kewil aytamız.

Ájiniyaz atındaǵı Nókis mámleketlik pedagogikalıq institutı rektoratı, Sport klubı, Dene mádeniyatı fakulteti jámááti hám jámiyetlik shólkemleri.