Ózbekstan Respublikası Prezidentiniń 2024-jıl 4-marttaǵı «Zulfiya atındaǵı Mámleketlik sıylıǵı menen sıylıqlaw haqqında»ǵı qararına muwapıq, Nókis qalasındaǵı 1-sanlı balalar muzıka hám kórkem óner mektebi baqsıshılıq klasınıń muǵallimi, Ájiniyaz atındaǵı Nókis mámleketlik pedagogikalıq institutınıń pitkeriwshisi Xudaybergenova Gúlshınar Jangabaevna Zulfiya atındaǵı Mámleketlik sıylıqtıń laureatı boldı.

Gúlshınar Xudaybergenova 2017-2021-jıllarda instituttıń Pedagogika fakulteti muzıkalıq tálim baǵdarında, 2021-2023-jıllararalıǵında Magistratura bólimi muzıkalıq tálim hám kórkem óner qánigeliginde oqıdı. Ustazı hám ilimiy basshısı, docent Sofiya Tájetdinova menen birgelikte ilimiy-izertlew jumısların alıp bardı.

Ol institutta hám respublikalıq kólemde ótkerilgen festivallar, xalıqaralıq tańlawlar, Nawrız hám Ǵárezsizlik bayramları múnásibeti menen ótkeriletuǵın koncert baǵdarlamalarında belsene qatnasıp, diplomlar, húrmet jarlıqları menen sıylıqlandı.

Gúlshınar óziniń talantı, uqıbı, talapshańlıǵı, óz ústinde tınbay izleniwi hám tálim-tárbiyası menen teńlesleri arasında ayrıqsha itibar hám mehirge ılayıq bolǵan, úlgili studentlerdiń biri boldı.

Biz óz gezeginde Gúlshınar Xudaybergenovanı Zulfiya atındaǵı Mámleketlik sıylıqtıń laureatı bolǵanı menen qutlıqlay otırıp, onıń aldaǵı dóretiwshilik hám ilimiy jumıslarında tabıslar tileymiz!

NMPI baspasóz xızmeti.