Ájiniyaz atındaǵı Nókis mámleketlik pedagogikalıq institutında 8-mart – Xalıqaralıq hayal-qızlar kúni bayramı múnásibeti menen fakultetlerde oqıp atırǵan student qızlar arasında «Báhár malikası» tańlawı shólkemlestirildi.

Sálemnama, yaǵnıy tanıstırıw, Ózbekstan xalıq shayırı Zulfiya Israilova dóretiwshiliginen monolog hám erkin tema (ayaq-oyın, qosıq aytıw, kórkem oqıw, saxnalıq kórinis, óz qábiletinen kelip shıǵıp tigiw, toqıw, gúldáste islew hám t.b.) sıyaqlı shártler boyınsha ótkerilgen tańlawǵa fakultet basqıshında jeńimpaz bolǵan student qızlar qatnastı.

Qatnasıwshılardıń hár bir shártti orınlawı, ózleriniń tayarlıqları hám sheberliklerin kórsetiwi tóreshiler quramı aǵzaları tárepinen múnásip bahalandı.

Solay etip, tańlaw juwmaǵında:
1-orındı – Baslawısh tálim fakulteti studenti Shaxnoza Yuldasheva hám Tariyx fakultetiniń studenti Azada Genjebaeva;
2-orındı – Túrkiy tiller fakulteti studenti Malika Uzaqbaeva;
3-orındı – Mektepke shekemgi tálim fakultetiniń studenti Kumush Erkebaeva iyeledi.

Tańlaw juwmaǵında barlıq qatnasıwshılar institut kásiplik awqamı komiteti tárepinen bayram sawǵaları menen sıylıqlandı.

– Tańlawdı ótkeriwden tiykarǵı maqsetimiz institutta oqıp atırǵan student qızlardı qollap-quwatlaw, olardı ulıwma insanıylıq hám milliy úrp-ádetlerge sadıqlıq, Watanǵa muhabbat, joqarı ádep-ikramlılıq ruwxında tárbiyalaw, sonday-aq, hayal-qızlardıń shańaraq hám jámiyettegi ornın bekkemlew, qızlardı shańaraqqa tayarlawdan ibarat. Búgingi tańlawda qatnasqan barlıq studentlerimiz jámiyettegi eń aldınǵı hayal-qızlar bolıp jetisip shıǵadı dep isenemiz, – deydi institut rektorınıń hayal-qızlar máseleleri boyınsha másláhátshisi Sayyora Bekchanova.

Institutta bayramǵa arnalǵan ilajlar dawam etpekte.

NMPI baspasóz xızmeti.