Ájiniyaz atındaǵı Nókis mámleketlik pedagogikalıq institutında 8-mart – Xalıqaralıq hayal-qızlar kúni múnásibeti menen bayram keshesi shólkemlestirildi.

Ilajda institut rektorı wazıypasın waqıtsha atqarıwshısı Quvondiq Qodirov sózge shıǵıp, elimizde hayal-qızlardıń shańaraqtaǵı, jámiyettegi hám mámleketlik basqarıwdaǵı ornın bekkemlew, olardıń oqıwı, jumıs islewi ilimiy-izertlew hám isbilermenlik penen shuǵılanıwı ushın jaratılıp atırǵan imkaniyatlar haqqında aytıp ótti hám barlıq hayal-qızlardı bayram menen qutlıqladı.

– Mart ayı jańalanıw hám jasarıw máwsimi bolǵan báhár dárekshisi bolıp qalmastan, kewillerimizge, ómirimizge mazmun baǵıshlaytuǵın áziz hám qádirli hayal-qızlarımızdıń bayramı menen baslanıwı menen áhmiyetli. Sonlıqtan, biz mart ayın institutımızda hayal-qızlarǵa bolǵan itibar hám ǵamqorlıqlar ayı sıpatında belgilep atırmız, – dedi Q.Qodirov óz bayram qutlıqlawında.

Házirgi waqıtta institutta ulıwma 600 ge shamalas professor-oqıtıwshı miynet etip atırǵan bolsa, sonnan 300 den aslamı hayal-qızlardan ibarat. Sonday-aq, 530 dan aslam qánige xızmetkerlerdiń de teń yarımı hayal-qızlar bolıp esaplanadı.

Búgingi kúnde olar mámleketimizde joqarı bilimlendiriw tarawınıń hár tárepleme rawajlanıwı, bilimlendiriw mákemelerine zamanagóy dúnyaqarasqa, bilim hám kónlikpelerge iye bolǵan qánigeli pedagog kadrlardı tayarlap shıǵarıw ushın jemisli miynet etpekte.

Olar arasında professor, docentler, joqarı potencialǵa iye bolǵan ilimpazlar, óz kásibiniń professional qánigeleri kópshilikti quraydı.

Institutta 17 mıńǵa shamalas student-jaslar bilim alıp atırǵan bolsa, sonnan 12 mıńnan aslamı hayal-qızlardan ibarat studentler esaplanadı. Olardıń keleshekte elimizdiń rawajlanıwına múnásip úleslerin qosıwı ushın sharayatlar jaratıw, sonıń menen birge, aldımızǵa belgilep alǵan joqarı maqsetlerimizge erisiwde olardıń rolin arttırıwǵa da ayrıqsha itibar qaratılmaqta.

Joqarı oqıw orınları, texnikum hám kolledjlerde oqıp atırǵan qızlarǵa kontrakt tólemleri ushın 7 jıllıq múddetke procentsiz tálim kreditleriniń ajıratılıp atırǵanı, magistraturada oqıp atırǵan qızlardıń kontrakt tólemleri tolıǵı menen mámleketlik byudjetten qaplanıp atırǵanlıǵı, sonday-aq, sociallıq qorǵawǵa mútáj, ata-anasınan ayrılǵan qızlar ushın joqarı oqıw orınlarına mámleketlik grant tiykarında qosımsha kvotalardıń beriliwi jolǵa qoyılǵanlıǵı – bulardıń hámmesi mámleketimizde hayal-qızlar ushın jaratılıp atırǵan sharayat hám imkaniyatlardıń ámeliy kórinisleri bolıp tabıladı.

Bayram keshesinde tarawda kóp jıllardan berli pidayılıq penen nátiyjeli miynet etip atırǵan professor-oqıtıwshılar, qánige hayal-qızlar, sonıń menen birge, oqıwda hám jámiyetlik jumıslarda belsendilik kórsetip kiyatırǵan student qızlar institut rektoratı jáne kásiplik awqamı komiteti tárepinen húrmet jarlıqları, bayram sawǵaları menen sıylıqlandı.

Ilaj instituttıń talantlı studentleri hám «Tumaris» xalıq ansambli aǵzaları atqarıwındaǵı koncert baǵdarlaması menen dawam etti.

NMPI baspasóz xızmeti.