Assalawma áleykum, áziz hayal-qızlar – mehriban analar, húrmetli apa-qarındaslar!

Ana tábiyat ózgeshe gózzallıqqa bólenip atırǵan, jańalanıw hám jasarıw dárekshisi báhár áyyamınıń búgingidey ájayıp demlerinde Sizlerdi hám Sizler arqalı barlıq jaqınlarıńızdı 8-mart – Xalıqaralıq hayal-qızlar kúni bayramı menen shın júrekten qutlıqlayman.

Usınday shadlı máwritlerge tolı demlerde kewlimizge túygen bir pikirdi hesh ekilenbesten aytıwdı maqul dep esaplayman.

Dúnyada baxıtlı ómir súriw ushın tiykar jaratatuǵın, perzentlerimizdi ullı insan etip tárbiyalaytuǵın, shańaraqlardıń bekkemligin támiyinleytuǵın, biz ushın muhabbat, opadarlıq hám sadıqlıq simvolına aylanǵan – bul, álbette, Sizler bolasız!

Ómir soqpaqlarında qanday awır sınaqlar hám mashqalalarǵa dus kelsek te, olardı jeńip ótiw ushın ruwxımızdı kóterip, kúshimizge – kúsh, jigerimizge – jiger qosatuǵın insanlar da hayal-qızlar bolıp esaplanadı.

Sonlıqtan da, ullı oyshıllar hayal-qızlardı perishtege megzeydi.

Biz aldımızǵa qoyǵan ullı maqsetlerimizge erisiw jolında, yaǵnıy Úshinshi Renessanstıń tiykarın jaratatuǵın, Jańa Ózbekstannıń hám Jańa Qaraqalpaqstannıń hár tárepleme rawajlanıwı ushın ayanbay xızmet etetuǵın keleshek áwladlardıń tálim-tárbiyası sıyaqlı iygilikli islerimizde hayal-qızlarımızdıń múnásip úlesi jáne ajıralmas ornı bar ekenligin ayrıqsha atap ótemiz.

Búgin erler menen bir qatarda turıp, barlıq tarawlarda belsendilik kórsetip atırǵan Sizlerdey pidayı insanlarǵa tájim ete otırıp, bekkem densawlıq, jumıslarıńızda mol tabıslar, shańaraqlarıńızǵa amanlıq, mol ırısqı-nesiybe, baxıtlı hám mazmunlı ómir tileymen!

Ullı shayırımız, institutımız pitkeriwshisi, Ózbekstan Qaharmanı Ibrayım Yusupovtıń tómendegi qosıq qatarları joqarıdaǵı pikirlerimizdiń ayqın dálili desek boladı:

Aralıqtan túrli zaman keshse de,
Dástúrler ózgerip ayra tússe de,
Barlıq bayram kalendardan óshse de,
Siziń bayramıńız óshpegey, qızlar!

Sheksiz húrmet penen,

Quvondiq Qodirov.
Ájiniyaz atındaǵı Nókis mámleketlik pedagogikalıq institutı rektorı w.w.a.