Ájiniyaz atındaǵı Nókis mámleketlik pedagogikalıq institutında Túrkiy tiller fakulteti ózbek tili hám ózbek ádebiyatı kafedraları tárepinen «Ózbek til bilimi hám ádebiyattanıwınıń rawajlanıwı, xalıqaralıq birge islesiw máseleleri» atamasındaǵı xalıqaralıq ilimiy-ámeliy konferenciya shólkemlestirildi.

Konferenciyanıń ashılıw plenar májilisinde institut professor-oqıtıwshıları, respublikamızdaǵı aldınǵı joqarı oqıw orınları hám ilimiy-izertlew oraylarınıń ilimpazları menen bir qatarda Túrkiya Respublikası Ankara universiteti, Qazaqstan Respublikası Qazaq agrotexnikalıq izertlew universiteti, Qırǵızstan Respublikası Qırǵızstan-Túrkiya Manas universiteti sıyaqlı túrkiy tilles mámleketlerdiń belgili filolog alımları hám usı tarawda izertlew alıp barıp atırǵan izleniwshiler óz bayanatları menen qatnastı.

Atap aytqanda, instituttıń ózbek tili kafedrasınıń professorı, filologiya ilimleriniń doktorı Gulmurza Qurbaniyazov «Qaraqalpaqstandaǵı tiller jaǵdayında eki tillilik hám kóp tillilik», Ankara universiteti Zamanagóy túrkiy tiller hám ádebiyatlar bólimi professorı, filologiya ilimleriniń doktorı Aynur Óz-Ózjan «Ózbek tili hám ádebiyatınıń Túrkiyada úyreniliwi», Qazaq agrotexnikalıq izertlew universiteti Qazaq hám orıs tilleri kafedrasınıń docenti, filologiya ilimleriniń kandidatı T.Toqsanbaeva «Tillik qarım-qatnas hám kod máselesi», Qırǵızstan-Túrkiya Manas universiteti Ádebiyat fakulteti túrkologiya bólimi baslıǵı, filologiya ilimleriniń kandidatı, docent Erdal Aydoǵmush «Túrkiyada Álisher Nawayı haqqında alıp barılǵan ilimiy-izertlewler», instituttıń ózbek ádebiyatı kafedrasınıń docenti, filologiya ilimleriniń kandidatı Sadulla Matyakupov «Ádebiyattanıwda dialog tariyxı hám teoriyalıq talqılawlar», ózbek tili kafedrasınıń assistent-oqıtıwshısı Oybek Xaytbaev «Qaraqalpaq jazıwshılarınıń frazeologiyalıq sinonimlerden paydalanıw sheberligi» atamalarındaǵı bayanatlarında búgingi kúnde usı baǵdarlardaǵı ilimiy-izertlew jumıslarınıń áhmiyetine ayrıqsha toqtalıp ótti.

Xalıqaralıq konferenciya «Til bilimi teoriyası: mashqala hám sheshimler», «Salıstırmalı til bilimi hám awdarma teoriyası», «Folklortanıw hám klassikalıq ádebiyat», «Ádebiyat teoriyası, ádebiy sın hám ádebiy process», «Til hám ádebiyattı oqıtıwda innovaciyalıq qatnas» sıyaqlı sekciyalarda óz jumısın dawam etti.

Ilaj juwmaǵında konferenciya dawamında kóterilgen máselelerdiń sheshimleri boyınsha tiyisli orınlarǵa usınıslar beriw, sonıń menen birge, tarawda xalıqaralıq baylanıslar hám birge islesiw jumısların jańa basqıshqa alıp shıǵıw boyınsha qararlar qabıl etildi.

NMPI baspasóz xızmeti.