Mámleketimizde qábiletli jaslardıń baslamaların qollap-quwatlaw baǵdarında ámelge asırılıp atırǵan jumıslardı bunnan bılay da jedellestiriw, olardı ilimiy-texnikalıq jumıslarǵa keńnen tartıw, qábiletli jaslardıń, sonıń ishinde, alıs aymaqlarda jasaytuǵın qız-jigitlerdiń bilim, kónlikpe hám tájiriybesin arttırıw maqsetinde ótkerilip kiyatırǵan «Mırza Ulıǵbek áwladları» respublikalıq tańlawınıń Qaraqalpaqstan Respublikası basqıshı bolıp ótti.

Oǵan respublikamızdan 80 nen aslam jaslar ózleriniń innovaciyalıq ideyaları, startap joybarları menen qatnastı.

Tańlawdıń aymaqlıq basqıshında jeńimpaz dep tabılǵan 20 joybar ishinde Ájiniyaz atındaǵı Nókis mámleketlik pedagogikalıq institutı jaslarınıń da bar ekenligi bizler ushın maqtanısh esaplanadı.

Atap aytqanda, fizikanı oqıtıw metodikası kafedrasınıń stajyor-oqıtıwshısı Zinatdin Bazarbaev, texnologiyalıq tálim kafedrasınıń laborantı Zulfiya Erekeeva, Tábiyiy pánler fakultetiniń 4-kurs studenti Jalalatdin Usnatdinov, Shet tilleri fakultetiniń 1-kurs studenti Alfiya Amangeldieva, Tariyx fakultetiniń 1-kurs studenti Jasurbek Xayrullaev hám Fizika-matematika fakultetiniń 4-kurs studenti Irodaxon Rajabovalar tańlawdıń Qaraqalpaqstan Respublikası basqıshında jeńimpaz dep tabılıp, respublikalıq basqıshta qatnasıw ushın jollamaǵa iye boldı.

Esletip ótemiz, tańlawdıń:
– Qalalıq (rayonlıq) basqıshı jeńimpazları bazalıq esaplaw muǵdarınıń 5 esesi;
– Qaraqalpaqstan Respublikası basqıshı jeńimpazları bazalıq esaplaw muǵdarınıń 10 esesi;
– Respublikalıq basqısh jeńimpazları bazalıq esaplaw muǵdarınıń 20 esesi muǵdarında xoshametlenedi.

NMPI jaslarına tańlawdıń respublikalıq basqıshında áwmet tileymiz!

NMPI baspasóz xızmeti.