Búgin, 7-may kúni Ájiniyaz atındaǵı Nókis mámleketlik pedagogikalıq institutında «Ózbekstan – 2030» strategiyasında ruwxıy-aǵartıwshılıq, siyasiy-huqıqıy, sociallıq-ekonomikalıq máselelerdiń aktuallıǵı» atamasındaǵı respublikalıq ilimiy-teoriyalıq konferenciyası bolıp ótti.

Instituttıń milliy ideya, ruwxıylıq tiykarları hám huqıq tálimi kafedrası tárepinen shólkemlestirilgen konferenciyaǵa Ózbekstan Respublikası Ishki isler ministrligi akademiyası professorı, Rossiya sociallıq ilimler akademiyasınıń akademigi, sociologiya ilimleriniń doktorı Abdullahad Qahxorov, Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵınıń orınbasarı Nariman Shınnazarov, Qaraqalpaq mámleketlik universiteti milliy ideya, ruwxıylıq tiykarları hám huqıq tálimi kafedrasınıń baslıǵı, siyasiy ilimleriniń doktorı, professor Almagúl Bayrieva, institut professor-oqıtıwshıları, doktorantlar, magistrantlar hám studentler qatnastı.

Konferenciyanı instituttıń ilimiy isler hám innovaciyalar boyınsha prorektorı Raxat Eshmuratov basqarıp bardı.

Ilajda bayanatshılar tárepinen atap ótilgenindey, xalqımızdıń erkin hám abadan, qúdiretli Jańa Ózbekstandı qurıw boyınsha erk-ıqrarın ámelge asırıw, hár bir puqaraǵa óz potencialın rawajlandırıw ushın barlıq imkaniyatlardı jaratıw, salamat, bilimli hám ruwxıy jetik áwladtı tárbiyalaw, globallıq óndiristiń áhmiyetli buwınına aylanǵan kúshli ekonomikanı qáliplestiriw, ádillik, nızam ústemligi, qáwipsizlik hám turaqlılıqtı kepillikli támiyinlew maqsetinde Ózbekstan Respublikası Prezidenti tárepinen «Ózbekstan – 2030» strategiyası islep shıǵıldı hám tastıyıqlandı.

Konferenciyada «Ózbekstan – 2030» strategiyası sheńberinde Ózbekstan hám Qaraqalpaqstannıń ekologiyalıq rawajlanıw strategiyası, Jańa Ózbekstanda puqaralıq jámiyetin rawajlandırıwda jaslardıń salamat dúnyaqarasın jetilistiriwdiń áhmiyeti, jaslardıń ádep-ikramlılıq tárbiyasınıń mazmunı, ekologiyalıq apatshılıq aqıbetlerin jumsartıw, sonday-aq, jaslar tálim-tárbiyasınıń áhmiyetli máselelerine baǵıshlanǵan bayanatlar tıńlandı.

Konferenciya óz jumısın sekciyalar boyınsha dawam ettirdi.

NMPI baspasóz xızmeti.