Búgin, 15-may kúni Ájiniyaz atındaǵı Nókis mámleketlik pedagogikalıq institutında bilimlendiriw tarawınıń pidayısı, matematikanı oqıtıw metodikası kafedrasınıń docenti Mamıt Asqarovtıń 70 jıllıǵına arnalǵan yubiley keshesi bolıp ótti.

Ilajdı instituttıń ilimiy isler hám innovaciyalar boyınsha prorektorı R.Eshmuratov basqarıp bardı.

Keshede instituttıń Fizika-matematika fakulteti dekanı R.Jiyemuratov, professorlar Barlıqbay Prenov hám Qanatbay Ismayılov, institut akademiyalıq liceyiniń direktorı Q.Qalxorazov, belgili ilimpazlar, yubiley iyesiniń basqa da kásiplesleri, shákirtleri sózge shıǵıp, onıń ómiri, ilimiy-pedagogikalıq xızmetleri haqqında maǵlıwmat berdi.

Mamıt Asqarov 1954-jılı 15-mayda Kegeyli rayonında dúnyaǵa kelgen. 1975-jılı sol dáwirdegi Qaraqalpaq mámleketlik pedagogikalıq institutınıń Fizika-matematika fakultetin tabıslı pitkerip shıqqannan soń bilimlendiriw tarawında óz miynet jolın basladı. Ómiri dawamında mektep muǵallimshiliginen baslap licey direktorlıǵına shekemgi juwapkerli wazıypalardı ádiwli atqardı.

1991-1998-jılları Qaraqalpaq mámleketlik universitetinde oqıtıwshı bolıp islegen dáwirinde Ukraina Ilimler Akademiyasınıń matematika institutında ilimiy izleniwshi sıpatında jumıs alıp barıp, matematikalıq analiz qánigeligi boyınsha «Operatorlıq teńlemelerdi sheshiwdiń bir adımlı approksimaciyalıq-interaktivlik metodların optimallastırıw» degen temada kandidatlıq dissertaciyasın tabıslı qorǵadı.

Ol 2005-2010-jıllarda Ózbekstan Respublikası Oliy Majlisi Nızamshılıq palatasınıń deputatı sıpatında siyasiy baǵdardaǵı jumısların alıp bardı.

2015-jıldan berli institutımızda jaslarǵa matematika páninen eń aldınǵı bilimlerdi berip, olardıń ilimiy-pedagogikalıq jumıslarına basshılıq etip kelmekte. Onıń shákirti matematika hám informatika tálim baǵdarınıń 2-kurs studenti Ismetulla Nawrızbaev bıyılǵı oqıw jılında ál-Xorezmiy atındaǵı xalıqaralıq matematika pán olimpiadasında sıylı 3-orındı iyeledi.

Ilimiy-pedagogikalıq xızmeti dawamında 10 nan aslam oqıw-metodikalıq qollanba, sabaqlıq, 70 ten aslam ilimiy maqalalar, 90 nan aslam tezislerdi baspadan shıǵardı.

Keshe sońında yubiley iyesi Mamıt Asqarovtıń ózi sózge shıǵıp, kórsetilip atırǵan usınday itibar ushın shólkemlestiriwshilerge, kelgen miymanlarǵa óz minnetdarshılıǵın bildirdi.

NMPI baspasóz xızmeti.