Ájiniyaz atındaǵı Nókis mámleketlik pedagogikalıq institutı Tábiyiy pánler fakulteti tárepinen «Tábiyiy pánlerdiń aktual máseleleri» atamasındaǵı V xalıqaralıq ilimiy-teoriyalıq konferenciyası shólkemlestirildi.

Konferenciyanıń ashılıw plenar májilisinde Qazaqstan Respublikası, sonday-aq, respublikamızdaǵı jetekshi joqarı oqıw orınları, ilimiy-izertlew oraylarınıń alımları, fakultet professor-oqıtıwshıları, doktorantlar, magistrantlar hám studentler qatnastı.

Tashkent mámleketlik pedagogikalıq universiteti botanika hám ekologiya kafedrasınıń professorı Sherimmat Avazov, Qazaqstan Respublikası Aqtóbe regionallıq universiteti professorı Bazarxan Imangalieva, Ózbekstan Ilimler Akademiyası Zoologiya institutı úlken ilimiy xızmetkeri, molekulyar zoologiya laboratoriyasınıń baslıǵı Oybek Amirov, Qazaqstan Respublikası Evraziya milliy universiteti professorı, biologiya ilimleriniń kandidatı Nuriya Omarova óz bayanatları menen shıǵıp sóyledi.

Konferenciyada atap ótilgenindey, sońǵı jılları Aralboyı regionında ekologiyalıq jaǵdaydı túp-tiykarınan jaqsılaw, aymaqtı sociallıq-ekonomikalıq jaqtan rawajlandırıwdı jedellestiriw hám xalıqtıń turmıs tárizi hám dáramatların arttırıwǵa baǵdarlanǵan keń kólemli reformalar ámelge asırıldı.

Aral teńiziniń qurıp qalǵan bóleginde ekosistemanı jaqsılaw, izertlewler hám innovaciyalardıń aldınǵı tájiriybelerin engiziw maqsetinde Ózbekstan Respublikası Prezidenti janındaǵı Aralboyı xalıqaralıq innovaciyalıq orayı hám Birlesken Milletler Shólkeminiń Aralboyı regionı ushın Insan qáwipsizligi boyınsha kóp tárepleme sheriklik trast fondı shólkemlestirildi. Aral boyı regionın ekologiyalıq innovaciyalar hám texnologiyalar aymaǵı dep járiyalaw haqqında Birlesken Milletler Shólkemi Bas Assambleyasınıń arnawlı rezolyuciyası qabıl etildi.

Álbette, ámelge asırılıp atırǵan bunday jumıslar menen bire búgingi ekologiyalıq jaǵdaydı jaqsılaw baǵdarında isleniwi kerek bolǵan jumıslar oǵada kóp.

Konferenciyada bayanatshılar tárepinen usı hám tábiyiy pánlerdi oqıtıwdıń basqa da áhmiyetli máseleleri dógereginde ilimiy pikirler, juwmaqlar bildirildi.

Konferenciya sekciyalarda óz jumısın dawam etti.

NMPI baspasóz xızmeti.