Ájiniyaz atındaǵı Nókis mámleketlik pedagogikalıq institutında ilimiy-izertlew hám tálim-tárbiya jumısların jetilistiriw maqsetinde dúnyanıń jetekshi «TOP-1000»lıq dizimine kirgen joqarı oqıw orınları menen 60 qa shamalas shártnama hám memorandumlar dúzilgen.

Usınday xalıqaralıq birge islesiw jumıslarınıń nátiyjesinde institutta jıl basınan berli 30 dan aslam sırt elli professor-oqıtıwshılar, belgili ilimpazlar lekciya hám sheberlik sabaqların ótip, óz tájiriybeleri menen bólisti.

Instituttıń sırtqı bilimlendiriw bólimi gumanitar hám jámiyetlik pánlerdi aralıqtan oqıtıw kafedrası tárepinen «Baslawısh tálimde zamanagóy bilimlendiriw texnologiyaları» atamasında shólkemlestirilgen ilimiy-ámeliy seminarda Rossiya xalıqlar doslıǵı universitetiniń rus tili institutı úlken oqıtıwshısı, pedagogika ilimleriniń doktorı, professor Irina Prosvirkina óz bayanatı menen qatnastı.

Seminarǵa institut professor-oqıtıwshıları, doktorantlar, magistrantlar, pedagogika ilimine qızıǵıwshı jas ilimpazlar hám student-jaslar qatnastı.

Ilajda rossiyalı professor baslawısh tálimniń zamanagóy áhmiyetli mashqalaları, bilimlendiriwdi sanlastırıw sharayatında bolajaq baslawısh klass muǵallimlerin kóp mádeniyatlı bilimlendiriw ortalıǵındaǵı jumıs procesine tayarlaw boyınsha prezentaciyasın qatnasıwshılar názerine usındı.

Ilimiy-ámeliy seminardı shólkemlestiriwden gózlengen maqset zamanagóy bilimlendiriw sharayatında baslawısh klass muǵallimleriniń pedagogikalıq jumıslarınıń nátiyjeliligin arttırıw boyınsha óz ara tájiriybe almasıwdan ibarat boldı.

Sonday-aq, seminar barısında oqıw procesin shólkemlestiriw shártleri, mazmunı hám formalarında júz berip atırǵan ózgerisler jóninde pikir almasıldı.

Eki tárepleme birge islesiwdiń nátiyjeliligin arttırıw maqsetinde usınday ilimiy-pedagogikalıq ilajlardı turaqlı túrde shólkemlestirip turıwǵa kelisip alındı.

NMPI baspasóz xızmeti.