Mámleketimizde qábiletli jaslardıń baslamaların qollap-quwatlaw baǵdarında ámelge asırılıp atırǵan jumıslardı bunnan bılay da jedellestiriw, olardı ilimiy-texnikalıq jumıslarǵa keńnen tartıw, qábiletli jaslardıń, sonıń ishinde, alıs aymaqlarda jasaytuǵın qız-jigitlerdiń bilim, kónlikpe hám tájiriybesin arttırıw maqsetinde shólkemlestirilgen «Mırza Ulıǵbek áwladları» tańlawınıń respublikalıq final basqıshı bolıp ótti.

Oǵan Ózbekstan Respublikasınıń barlıq aymaqlarınan kelgen jaslar ózleriniń innovaciyalıq ideyaları, startap joybarları menen qatnastı.

Quwanıshlısı, tańlawda Ájiniyaz atındaǵı Nókis mámleketlik pedagogikalıq institutı Tábiyiy pánler fakultetiniń 4-kurs studenti Jalalatdin Usnatdinov 20-25 jas kategoriyasında medicina, medicinada málimleme texnologiyaları, awıl xojalıǵı, biotexnologiya, farmacevtika, social-gumanitar baǵdarlar boyınsha jeńimpazlar qatarınan orın aldı hám bazalıq esaplaw muǵdarınıń 20 esesi muǵdarında xoshametlendi.

Atap ótiw orınlı, tańlawdıń respublikalıq basqıshında institutımızdıń fizikanı oqıtıw metodikası kafedrasınıń stajyor-oqıtıwshısı Zinatdin Bazarbaev, texnologiyalıq tálim kafedrasınıń laborantı Zulfiya Erekeeva, Shet tilleri fakultetiniń 1-kurs studenti Alfiya Amangeldieva, Tariyx fakultetiniń 1-kurs studenti Jasurbek Xayrullaev hám Fizika-matematika fakultetiniń 4-kurs studenti Irodaxon Rajabovalar da belsene qatnasıp, sertifikatlarǵa iye boldı.

NMPI baspasóz xızmeti.