Ájiniyaz atındaǵı Nókis mámleketlik pedagogikalıq institutı sırtqı bilimlendiriw bólimi gumanitar hám jámiyetlik pánlerdi aralıqtan oqıtıw kafedrası tárepinen «Innovaciyalıq jumıs teoriyası hám ámeliyatı: mektepke shekemgi tárbiya hám baslawısh tálimniń úzliksizligi» atamasındaǵı xalıqaralıq ilimiy-ámeliy seminar ótkerildi.

Seminarda Rossiya Federaciyası Qazan federal universiteti mektepke shekemgi bilimlendiriw kafedrası professor-oqıtıwshıları hám Qazan qalasındaǵı mektepke shekemgi bilimlendiriw mákemeleriniń direktorları onlayn formatta ilaj qatnasıwshıları bolǵan Nókis qalasındaǵı mektepke shekemgi bilimlendiriw shólkemleriniń baslıqları, tárbiyashılar, metodistler, sonday-aq, institut professor-oqıtıwshıları jáne studentleri menen tarawdaǵı áhmiyetli máseleler boyınsha pikir almastı.

Seminarda autizm spektriniń buzılıwı hám basqa kesellikleri bolǵan balalar menen islesiw, tarawdaǵı jańa texnologiyalar, mektepke shekemgi jastaǵı balalar tilindegi kemshiliklerdi joq etiw usılı – logoritmlik oyınlar hám shınıǵıwlar arqalı pedagogikalıq dúzetiw máseleleri boyınsha dodalawlar, tájiriybe almasıwlar ótkerildi.

Ilaj sońında eki joqarı oqıw ornı arasındaǵı usınday birge islesiw jumısların rawajlandırıw boyınsha aldaǵı wazıypalar belgilep alındı.

NMPI baspasóz xızmeti.