Búgin, 10-iyun kúni Ájiniyaz atındaǵı Nókis mámleketlik pedagogikalıq institutı akademiyalıq liceyinde 2023-2024-oqıw jılı 2-kurs pitkeriwshi oqıwshılarına diplom tapsırıw máresimi bolıp ótti.

Ilajǵa instituttıń oqıw isleri boyınsha prorektorı wazıypasın waqıtsha atqarıwshısı A.Abdiev, bir qatar professor-oqıtıwshılar, licey jámááti, pitkeriwshi oqıwshılardıń ata-anaları hám keń jámiyetshilik wákilleri qatnastı.

Keshede licey direktorı Q.Kalxorazov sózge shıǵıp, licey oqıwshıları, sonıń ishinde, bıyılǵı oqıw jılında liceydi pitkerip atırǵan oqıwshı-jaslar tárepinen qolǵa kirgizilgen nátiyjeler haqqında aytıp ótti.

2023-2024-oqıw jılında akademiyalıq liceydi ulıwma 262 oqıwshı tabıslı pitkerip atırǵan bolıp, olar arasında respublikalıq hám xalıqaralıq pán olimpiadaları, tańlawlar, sport jarıslarında joqarı nátiyjelerge erisken jaslar kópshilikti quraydı.

Atap aytqanda, pitkeriwshilerden 40 oqıwshı qánigelik pánleri bolǵan qaraqalpaq tili, ózbek tili, tariyx, matematika, fizika hám biologiya pánlerinen milliy sertifikatlarǵa, al 95 oqıwshı shet tilin biliw boyınsha xalıqaralıq hám milliy dárejedegi sertifikatlardı aldı. Ásirese, anıq pánler baǵdarı 208-topar oqıwshıları 100 procent, 204-topar oqıwshıları 90 procent kórsetkish penen sertifikat alǵanlıǵın ayrıqsha atap ótiw orınlı.

Pitkeriwshiler arasınan 209-topar oqıwshısı Raxima Keńesbaeva Koreya Respublikasınıń Tashkent qalasındaǵı INHA universiteti, 204-topar oqıwshısı Jasmina Uzaqbaeva AQShtıń Kolorado universiteti, 205-topar oqıwshısı Nilufar Qurbanbaevalar AQShtıń Arizona universitetine oqıwǵa qabıl etilip, waqtınan burın student bolıwǵa miyasar boldı.

Shet tilleri baǵdarında 205-topar oqıwshısı Altınay Xojaniyazova respublikalıq pánler olimpiadasında qaraqalpaq tili hám ádebiyatı páninen sıylı 2-orındı iyeledi. Bul oqıwshınıń úlgili minez-qulqı, oqıw dawamında erisken jetiskenlikleri pedagogikalıq institut tárepinen itibarǵa alınıp, Ájiniyaz Qosıbay ulı atındaǵı stipendiya tańlawı jeńimpazı boldı.

Pitkeriwshi jaslar arasınan barlıq semestrlerde belgilengen pánlerden «ayrıqsha» bahalarǵa úlgergen, úlgili minez-qulqına iye hám jámiyetlik jumıslarǵa, tańlawlarǵa belsene qatnasıp kelgen 8 oqıwshı akademiyalıq liceydi pitkergenligi haqqında «Jeńillikli» diplom alıwǵa ılayıq dep tabıldı.

Ilajda usınday nátiyjelerdi qolǵa kirgizip kiyatırǵan oqıwshılarǵa diplomlar, olardıń ustazları hám ata-analarına húrmet jarlıqları saltanatlı túrde tapsırıldı.

Pitkeriw keshesi liceydiń talantlı oqıwshıları hám kórkem óner sheberleriniń atqarıwındaǵı koncert baǵdarlaması menen dawam etti.

NMPI baspasóz xızmeti.