Joqarı bilimlendiriw, ilim hám innovaciyalar ministri Qońıratbay Sharipov 2024-2025-oqıw jılı ushın joqarı oqıw orınlarına kiriw test sınaqları boyınsha maǵlıwmat berdi, – dep jazdı Qaraqalpaqstan xabar agentligi.

Atap ótiliwinshe, dizimnen ótiwdiń birinshi basqıshı juwmaqlanǵannan keyin, 1-25-iyul kúnleri dóretiwshilik imtixanlar, 14-28-iyul kúnleri test sınaqlarınıń ótkeriliwi rejelestirilgen.

Abiturientler dóretiwshilik imtixanda toplaǵan balın sol kúnniń ózinde, testte toplaǵan balın erteńine biliwi múmkin boladı.

Dóretiwshilik imtixan hám test sınaqları tolıq juwmaqlanǵannan keyin, 15 kún dawamında dizimnen ótiwdiń ekinshi basqıshında abiturientler test ballarınan kelip shıǵıp, besewge shekem joqarı oqıw ornın (baǵdar), bilimlendiriw túrin, tańlaw ústinligin, dóretiwshilik imtixan ótkerilgen baǵdarlar ushın bolsa qosımsha túrde tańlanǵan baǵdar boyınsha jáne sonsha joqarı oqıw ornın tańlaw huqıqı beriledi.