25-iyun kúni Ájiniyaz atındaǵı Nókis mámleketlik pedagogikalıq institutında 2024-2025-oqıw jılı ushın qabıllaw procesine arnalǵan baspasóz konferenciyası bolıp ótti.

Ilajda institut qabıllaw komissiyasınıń juwaplı xatkeri Janjayxan Dármenov ǵalaba xabar quralları wákilleri – jurnalistler hám blogerlerge bıyılǵı qabıllaw procesindegi áhmiyetli jańalıqlar haqqında maǵlıwmatlar berdi.

Ózbekstan Respublikası Prezidentiniń 2024-jıl 24-maydaǵı «Joqarı bilimlendiriw shólkemlerine oqıwǵa qabıllaw hám mámleketlik buyırtpasın jaylastırıw sistemasın jetilistiriw haqqında»ǵı pármanına muwapıq, 2024-2025-oqıw jılınan mámleketlik joqarı hám professional bilimlendiriw mákemelerine (kásip-óner mektebi buǵan kirmeydi) qabıllaw boyınsha imtixanlar «aldın test, sońınan tańlaw» principi tiykarında bir waqıtta ótkeriliwi belgilendi.

Abiturientler óz tańlawına bola test sınaǵı nátiyjesinde toplaǵan balınan kelip shıǵıp, dáslep joqarı bilimlendiriwdiń bakalavriat tálim baǵdarlarına, soń professional bilimlendiriw mákemelerine oqıwǵa kiriw ushın tańlawda qatnasadı.

Qabıllaw komissiyasınıń juwaplı xatkeri bıyılǵı jılı mámleketlik joqarı oqıw orınları bakalavriatına qabıllaw procesi 2 basqıshta ámelge asırılatuǵınlıǵı, ayrıqsha qábilet talap etiletuǵın bakalavriat tálim baǵdarlarına qabıllaw ushın usı jıldıń 1-25-iyul kúnleri kásiplik (dóretiwshilik) imtixanlar, 14-28-iyul kúnleri aralıǵında test sınaqları ótkeriliwi belgilengenligi, olardı shólkemlestiriw boyınsha joqarı dárejede tayarlıqlar alıp barılıp atırǵanlıǵı haqqında atap ótti.

Sonday-aq, qabıllaw procesin joqarı dárejede shólkemlestiriw, abiturientler hám olardıń ata-analarına áhmiyetli másláhátler beriw, tarawdaǵı jańalıqlar hám ózgerisler haqqında tolıq maǵlıwmat beriw maqsetinde institutta qabıllaw komissiyası hám onıń quramında másláhát jáne koll-oraylarınıń jumısı jolǵa qoyılǵanlıǵı, bul oraylar hár kúni saat 09:00 den 18:00 ge shekem turaqlı jumıs islep turǵanlıǵı boyınsha maǵlıwmat berdi.

Ilajda qabıllaw procesindegi jańalıqlar hám ózgerisler haqqında ǵalaba xabar quralları wákilleri ózleriniń qızıqtırǵan sorawlarına juwap aldı.

NMPI baspasóz xızmeti.