Ájiniyaz atındaǵı Nókis mámleketlik pedagogikalıq institutında 26-iyun – Xalıqaralıq náshebentlikke qarsı gúresiw kúni múnásibeti menen student-jaslar qatnasıwında ushırasıw bolıp ótti.

Ushırasıwda Qaraqalpaqstan Respublikası Ishki isler ministrliginiń xızmetkeri Allayar Ismayılov házirgi waqıtta respublikamız boylap náshebentlik hám psixotrop zatlardıń sawdası menen baylanıslı jınayatlardıń aldın alıw boyınsha tiyisli jumıslar alıp barılıp atırǵanına qaramastan, bunday jınayatlarda jaslardıń qatnasıw jaǵdayları da ushırasıp turǵanlıǵı, bul bolsa usı baǵdardaǵı profilaktikalıq jumıslardı ele de kúsheytiwdi talap etip atırǵanlıǵın atap ótti.

Házirgi waqıtta ayrım jaslar arasında náshebentlik zatlar, sonday-aq, quramında psixotrop zatlar bolǵan dárilerdi bilip-bilmey qabıllap, keyin ala olarǵa úyrenip qalıp atırǵan jaǵdaylar ushırasıp turıptı. Ásirese, óz úylerinen, ata-anasınan uzaqta, kvartirada jasap atırǵan studentler arasında bunday jaǵdaylardı boldırmaw kúnniń baslı wazıypalarınıń birinen bolıp tabıladı.

Bunday zıyanlı zatlar respublikamızǵa nızamǵa qayshı aylanba jollar arqalı kirip kelip atırǵanı, sonıń menen birge, internet tarmaqları arqalı nızamsız sawdalarınıń bolıp atırǵanı, jaslardıń olardan saqlanıwı boyınsha profilaktikalıq kónlikpeler berildi.

Ásirese, bunda eń dáslep hár bir studenttiń psixologiyalıq jaǵdayın jaqsılap, náshebentlik hám psixotrop zatlar haqqındaǵı bilimlerin arttırıw, bul arqalı olarda usı zatlardıń zıyanlı aqıbetleri haqqında túsinik jáne oǵan qarsı psixologiyalıq immunitet payda etiw bunday illetlerge qarsı gúresiwdegi eń nátiyjeli jol ekenligi atap ótildi.

Taraw qánigesi tárepinen jaslardıń náshebentlik hám psixotrop zatlarǵa úyrenip qalıwına biologiyalıq, psixologiyalıq hám sociallıq faktorlar tásir etip atırǵanı, olarǵa qarsı gúresiw baǵdarında alıp barılıp atırǵan jumıslar haqqında maǵlıwmatlar berildi.

NMPI baspasóz xızmeti.