Xabarıńız bar, Ózbekstan Respublikası Ministrler Kabinetiniń 2022-jıl 19-yanvardaǵı «Shet tillerin úyreniwdi jetilistiriw boyınsha qosımsha ilajlar haqqında»ǵı 34-sanlı qararına muwapıq, 2022-2023-oqıw jılı qabıllawınan baslap Ózbekstandaǵı shet tilleri boyınsha kadrlar tayarlawǵa qánigelestirilgen 8 joqarı oqıw ornı qatarında Ájiniyaz atındaǵı Nókis mámleketlik pedagogikalıq institutınıń «Shet tili hám ádebiyatı: inglis tili» bakalavriat tálim baǵdarına kiriw imtixanlarında shet tili páninen tıńlap túsiniw, oqıw, jazıw hám sóylew kompetenciyaların anıqlaw jáne bahalawǵa baǵdarlanǵan kásiplik (dóretiwshilik) imtixanı ótkerilip kiyatırǵan edi.

Ózbekstan Respublikası Prezidentiniń 2024-jıl 24-maydaǵı «Joqarı bilimlendiriw shólkemlerine oqıwǵa qabıllaw hám mámleketlik buyırtpasın jaylastırıw sistemasın jetilistiriw haqqında»ǵı pármanı tiykarında bul tártip biykar etildi.

Bul haqqında Ózbekstan Respublikası Bilim hám mamanlıqtı bahalaw agentligi direktorınıń orınbasarı Farhod Mirzaev «Ózbekstan 24» telekanalına bergen intervyusında aytıp ótti.

Párman tiykarında, 2025-2026-oqıw jılı qabıllawınan pánler kompleksinde shet tili birinshi pán sıpatında belgilengen tálim baǵdarlarına qabıllaw shet tilin biliw dárejesin belgileytuǵın milliy yamasa xalıqaralıq sertifikat tiykarında ámelge asırıladı.

«Respublikalıq joqarı bilimlendiriw mákemeleriniń tálim baǵdarları dizimi hám olarǵa sáykes test sınaqları (kásiplik (dóretiwshilik) imtixan) tapsırılatuǵın pánler kompleksi»nde kórsetip ótiliwinshe, 2024-2025-oqıw jılı qabıllawında «60110900 – Shet tili hám ádebiyatı: inglis tili» bakalavriat tálim baǵdarına kiriw imtixanları test formasında ótkeriledi.

Yaǵnıy, bunda:
1-pán: Shet tili;
2-pán: Ana tili hám ádebiyatı etip belgilengen.

Demek, ulıwmalastırıp aytqanda 2024-2025-oqıw jılı ushın qabıllawda Ájiniyaz atındaǵı Nókis mámleketlik pedagogikalıq institutınıń «Shet tili hám ádebiyatı: inglis tili» bakalavriat tálim baǵdarına kiriw imtixanları test sınaqları formasında ótkeriledi, 2025-2026-oqıw jılı qabıllawınan baslap usı tálim baǵdarına qabıllaw shet tilin biliw dárejesin belgileytuǵın milliy yamasa xalıqaralıq sertifikat tiykarında ámelge asırıladı.

NMPI baspasóz xızmeti.