Ájiniyaz atındaǵı Nókis mámleketlik pedagogikalıq institutında 2023-2024-oqıw jılı pitkeriwshilerine diplom tapsırıwǵa baǵıshlanǵan «Haq jol Sizge, pitkeriwshi!» atamasındaǵı saltanatlı keshe bolıp ótti.

Keshege bakalavr tálim baǵdarları hám magistratura qánigelikleri pitkeriwshileri, olardıń ata-anaları, professor-oqıtıwshılar, pedagog xızmetkerler, sonday-aq, keń jámiyetshilik hám ǵalaba xabar quralları wákilleri qatnastı.

Ilajda Qaraqalpaqstan Respublikası Ministrler Keńesi Baslıǵınıń orınbasarı Bayrambay Otemuratov, institut rektorı wazıypasın waqıtsha atqarıwshısı Quvondiq Qodirov sózge shıǵıp, barlıq pitkeriwshi jaslardı qutlıqladı hám aldaǵı jumıslarına tabıslar tiledi.

Juwmaqlanıp atırǵan bıyılǵı oqıw jılında Nókis mámleketlik pedagogikalıq institutın ulıwma 3 mıń 854 pitkeriwshi, sonnan bakalavriattıń kúndizgi tálim baǵdarları boyınsha 2 mıń 576, sırtqı tálim baǵdarları boyınsha 1 mıń 259 student, al magistratura qánigelikleri boyınsha 19 magistrant pitkerip shıqpaqta.

Pitkeriwshiler arasınan mıńlaǵan student-jaslar tiyisli jumıs beriwshiler menen úsh tárepleme shártnamalar dúziw arqalı jumıs orınlarına jollamalar aldı.

Ilajda bakalavriatura tálim baǵdarları hám magistratura qánigelikleri pitkeriwshilerine diplomlar tapsırıldı.

Atap ótiw orınlı, juwmaqlanıp atırǵan oqıw jılı institut tariyxında úlken tabıslarǵa, joqarı nátiyjelerge tolı jıllardıń biri sıpatında tariyx betlerinen orın aldı.

Instituttıń 15 studenti Ózbekstan kóleminde ótkerilgen mámleketlik stipendiyalar tańlawında, atap aytqanda, Ózbekstan Respublikası Prezidenti mámleketlik stipendiyası, Islam Karimov, Nawayı, Ibrayım Yusupov, Tólepbergen Qayıpbergenov, Zahiriddin Muhammed Babur, Pahlavon Mahmud atındaǵı mámleketlik stipendiyaları tańlawlarında jeńimpaz bolıp, stipendiat atandı. Sonıń menen birge, instituttıń bir topar belsendi studentleri Ájiniyaz Qosıbay ulı atındaǵı stipendiya tańlawında jeńimpaz boldı.

Institut student-jasları «Universiada», «Studentler ligası», «Bes baslama olimpiadası» sıyaqlı sport jarıslarınıń respublikalıq final basqıshlarında joqarı nátiyjelerdi qolǵa kirgizip, Qaraqalpaqstan Respublikası saylandı komandasınıń Ózbekstan kóleminde sıylı orınlardı iyelewine múnásip úleslerin qostı.

Mámleketimizde qábiletli jaslardı ilimiy-texnikalıq jumıslarǵa keńnen tartıw, qábiletli jaslardıń bilim, kónlikpe hám tájiriybesin arttırıw maqsetinde shólkemlestirilgen «Mırza Ulıǵbek áwladları» tańlawınıń respublikalıq final basqıshında institutımızdıń Tábiyiy pánler fakulteti 4-kurs studenti Jalalatdin Usnatdinov jeńimpaz dep tabılıp, bazalıq esaplaw muǵdarınıń 20 esesi muǵdarında xoshametlendi.

Ilaj dawamında oqıw jılı dawamında usınday ilim, bilimlendiriw, mádeniyat, sport hám basqa da baǵdarlarda úlken nátiyjelerge erisken, sonıń menen birge, hár qıylı respublikalıq hám xalıqaralıq tańlawlar, pán olimpiadaları, institut kóleminde ótkerilgen tańlawlardıń jeńimpazlarına hám olardıń ata-analarına sawǵalar, minnetdarshılıq xatları jáne húrmet jarlıqları tapsırıldı.

Pitkeriw keshesi sheńberinde instituttıń talantlı studentleri atqarıwındaǵı koncert baǵdarlaması ótkerilip, keshe qatnasıwshılarınıń kewillerine joqarı kóterińkilik baǵıshladı.

NMPI baspasóz xızmeti.