Prezident Shavkat Mirziyoyev 15-iyul kúni mámleketlik joqarı bilimlendiriw mákemelerine qabıllaw processleri, joqarı bilimlendiriw sistemasında sapanı arttırıw hám xalıqaralıq oqıw baǵdarlamaların engiziwge baylanıslı esabat penen tanıstı.

Házirgi kúnde joqarı bilimlendiriw mákemelerine qabıllaw imtixanları bolıp ótpekte. Usı jılı onda 805 mıń abiturient qatnaspaqta.

Juwapkerler 2024-2025-oqıw jılı ushın joqarı bilimlendiriw mákemelerine kadrlar tayarlaw mámleketlik buyırtpa rejesi boyınsha málimleme berdi. Atap ótilgenindey, usı jılı bakalavriatta da, magistraturada da injenerlik, qurılıs, tábiyǵıy pánler, matematika, málimleme texnologiyaları baǵdarlarına kvotalar sanı arttırılmaqta. Tólemli-kontrakt tiykarında qabıllaw mámleketlik hám mámleketlik emes joqarı bilimlendiriw mákemelerine birdey shártler tiykarında, oqıw mákemesiniń ilimiy potencialı hám texnikalıq bazasına súyengen halda ámelge asırıladı.

Mámleketimiz basshısı joqarı bilimlendiriw mákemelerine ulıwma mámleketlik buyırtpanı tastıyıqlaw, onda mámleketimizdiń rawajlanıwı hám miynet bazarı talaplarına itibar qaratıw boyınsha kórsetpeler berdi.

Elimizde injenerlik kadrlarǵa talap joqarı. 20-iyun kúni bolıp ótken videoselektor májilisinde usı tarawdaǵı joqarı bilimlendiriw mákemeleriniń jumısın jetilistiriw wazıypası qoyılǵan edi.

Máselen, Surxandáryada Termiz injenerlik-texnologiya institutı hám Termiz agrotexnologiyalar hám innovaciyalıq rawajlanıw institutı bar. Olardı keńeytiw arqalı Termiz mámleketlik injenerlik hám agrotexnologiyalar universitetin shólkemlestiriw rejelestirilmekte.

Bul nátiyjeli basqarıw sistemasın engiziw, bir-birin qaytalawshı fakultet hám kafedralardı qısqartıw, ayırım shtat birliklerin optimallastırıw imkaniyatın beredi.

Jańa universitette Aldınǵı injenerlik mektebi shólkemlestiriledi. Oǵan bilimi joqarı studentler tanlaw tiykarında alınıp, ámeliyatqa baqdarlanǵan arnawlı bilim baǵdarlamaları tiykarında oqıtıladı. Bul mekteptiń baǵdarlarına say sanaatta birge islesiwshiler belgilenip, zamanagóy laboratoriyalar shólkemlestiriledi. Olardıń usınısları tiykarında ilimiy-izertlew hám tájiriybe- konstruktorlıq jumısları jolǵa qoyıladı.

Universitettiń basqarıw hám oqıtıwshılıq lawazımlarına sırt el tájiriybesine iye, ilimiy hám ámeliy tájiriybesi joqarı qánigelerdi keńnen tartıw, olardıń jumıs nátiyjesin xalıqaralıq standartlar tiykarında bahalaw wazıypaları qoyıldı.

Mámleketimiz basshısı tarmaq, kárxana hám joqarı bilimlendiriw mákemesiniń óz-ara baylanısın bekkemlew, óz tarawında aldıńǵı, básekiles qánigeler tayarlaw zárúr ekenligin atap ótti.

Ózbekstan Prezidentiniń 2023-jılı sentyabr ayında AQShqa saparı dawamında bilimlendiriw tarawı boyınsha da kelisimlerge erisilgen edi. Oǵan muwapıq, Tashkent qalasında Amerika texnologiyalar universiteti ashılıwı kútilmekte.

Onıń jumısı 2024-2025-oqıw jılınan baslanadı. Universitette injenerlik, arxitektura hám dizayn, málimleme texnologiyaları, densawlıqtı saqlaw, ekonomika hám finans, xalıqaralıq qatnasıqlar tarawları ushın kadrlar tayarlanadı. Pitkeriwshilerge Arizona mámleketlik universiteti yaki AQShta tán alınatuǵın birge islesiwshi sırt el universitetiniń diplomı beriledi.

Bul baǵdardaǵı shólkemlestiriw ilajları hám keleshektegi maqsetler belgilenip alındı.

Qaraqalpaqstan xabar agentligi.