Ájiniyaz atındaǵı Nókis mámleketlik pedagogikalıq institutınıń 35 professor-oqıtıwshısı «QS World University Rankings» xalıqaralıq reyting shólkemi tárepinen dúnyanıń eń aldınǵı «TOP-200»lik dizimine kirgizilgen Qazaqstan Respublikasınıń Ál-Farabiy atındaǵı Qazaq milliy universitetinde qánigeligin arttırıw kursında qatnasıp, sertifikatlarǵa iye boldı.

Sońǵı jıllarda mámleketimizde joqarı bilimlendiriw sistemasın sapalıq jaqtan jańa basqıshqa kóteriw, «TOP-1000»lıq dizimge kiretuǵın joqarı oqıw orınları hám ilimiy-izertlew orayları menen eki tárepleme baylanıslardı ornatıw arqalı xalıqaralıq tán alınǵan zamanagóy bilimlendiriw standartları hám texnologiyaların ózlestiriwge ayrıqsha itibar qaratılmaqta.

Bunda, álbette, sırt ellerdegi eń aldınǵı joqarı oqıw orınlarında shólkemlestirilip atırǵan qánigeligin arttırıw, tájiriybe almasıw kurslarında qatnasıwdıń áhmiyeti úlken.

Ál-Farabiy atındaǵı Qazaq milliy universiteti hám Ájiniyaz atındaǵı Nókis mámleketlik pedagogikalıq institutı arasında dúzilgen memorandum sheńberinde usı jıldıń iyun-iyul ayları dawamında shólkemlestirilgen qánigeligin arttırıw kursında institutımızdıń pedagogika hám psixologiya, shet tilleri, sonday-aq, ana tili hám ádebiyatı, anıq hám tábiyiy pánler, málimleme texnologiyaları tarawları boyınsha professor-oqıtıwshıları óz ara tájiriybe almastı.

Kurslar dawamında bilimlendiriwge sanlı texnologiyalardı engiziw, atap aytqanda, málimleme-kommunikaciyalıq texnologiyalar imkaniyatları hám elektron resurslardan nátiyjeli paydalanıw boyınsha jańa kónlikpelerdi ózlestirdi.

NMPI baspasóz xızmeti.