Búgin, 16-avgust kúni Ájiniyaz atındaǵı Nókis mámleketlik pedagogikalıq institutında 2024-2025-oqıw jılı ushın sırt el hám mámleketlik emes joqarı oqıw orınlarınan instituttıń ayrıqsha qábilet talap etiletuǵın tálim baǵdarlarına oqıwdı kóshiriw boyınsha kásiplik (dóretiwshilik) imtixanlar baslandı.

Bakalavriattıń súwretlew óneri hám injenerlik grafikası, sonday-aq, muzıkalıq tálim baǵdarlarına oqıwdı kóshiriw ushın kásiplik (dóretiwshilik) imtixanlar búgin ótkerilip atırǵan bolsa, erteń, 17-avgust kúni dene mádeniyatı tálim baǵdarına imtixanlar bolıp ótiwi rejelestirilgen.

Kásiplik (dóretiwshilik) imtixanlar joqarı tájiriybege iye professor-oqıtıwshılar tárepinen alınıp atırǵan bolıp, imtixanlardıń ádil túrde ótiwi instituttıń korrupciyaǵa qarsı gúresiw «Komplaens-qadaǵalaw» sistemasın basqarıw bólimi wákilleri tárepinen qadaǵalanbaqta.

Esletip ótemiz, dene mádeniyatı tálim baǵdarına oqıwdı kóshiriw ushın kásiplik (dóretiwshilik) imtixanlar erteń, 17-avgust kúni Nókis qalasındaǵı 9-sanlı ulıwma bilim beriw mektebiniń sport maydanshasında bolıp ótedi.

Talabanlar imtixanda qatnasıw ushın ruxsatnamanı Bilimdi bahalaw agentliginiń my.uzbmb.uz saytındaǵı jeke kabinetinen alıwı múmkin.

Onda kásiplik (dóretiwshilik) hám test sınaǵı imtixanlarınıń ótkeriliw ornı, sánesi hám waqtı haqqındaǵı maǵlıwmatlar kórsetilgen.

Talabanlar test sınaǵı ótkeriletuǵın orınǵa ruxsatnamada belgilengen waqıttan keshikpegen halda, pasport (ID-karta) hám ruxsatnaması menen keliwi shárt.

Eskertiw: kásiplik (dóretiwshilik) imtixanlarda qatnasqan talabanlar májbúriy pánlerden (ana tili, matematika, tariyx) ótkeriletuǵın test sınaqlarında da qatnasıwı shárt. Kerisinshe jaǵdayda, olardıń kásiplik (dóretiwshilik) imtixanda alǵan balları esapqa alınbaydı.

NMPI baspasóz xızmeti.