Xabarıńız bar, búgin, 17-avgusttan baslap 2024-2025-oqıw jılı ushın joqarı oqıw orınlarınıń bakalavriat tálim baǵdarlarına kiriw test sınaqları boyınsha tańlaw nátiyjeleri járiyalandı. Juwmaqlawshı tańlaw nátiyjeleri (mandat) menen elimizdiń bir qatar jasları student bolıw baxtına miyasar boldı.

Atap ótiw orınlı, Prezidentimizdiń ǵamqorlıǵı hám itibarı nátiyjesinde qaraqalpaqstanlı jaslarǵa birqatar imkaniyatlar jaratıp berilmekte. Solay eken, bıyılǵı jılda studentler qatarınan orın ala almaǵan qala hám rayonlarımızda jasawshı abiturientler ele sheshim qabıllawına erte.

Sebebi, jaslarǵa berilgen imkaniyatlar qatarında 2022-jıl 31-avgusttaǵı 213-sanlı Prezident pármanı menen Qaraqalpaqstan Respublikasında turaqlı jasaytuǵın, ulıwma orta, orta arnawlı hám professional bilimlendiriw mákemelerin pitkergen jaslar ushın 2023-2024-oqıw jılında mámleketlik grant tiykarında qosımsha 3 mıń kvota, sonıń menen birge, tólemli kontrakt tiykarında qosımsha 6 mıń 500 kvota ajıratılǵan edi.

Párman menen hár jılı qaraqalpaqstanlı 6500 jastıń qosımsha kvota tiykarında Nókis hám Tashkent qalasınan tısqarı wálayatlardaǵı mámleketlik joqarı oqıw orınlarına oqıwǵa kiriwi hám joqarı bilim alıwı ushın imkaniyat jaratılıwı belgilengen bolıp, bıyılǵı jılda da wálayatlardaǵı joqarı oqıw orınların tańlaǵan abiturientler ushın qosımsha kvotalar ajıratılıwı názerde tutılmaqta.

❗️Bunnan túsiniwimiz múmkin, búgingi járiyalanıp atırǵan mandat nátiyjeleri boyınsha student bolǵanlardan tısqarı jáne 6500 jasımız joqarı oqıw orınlarına qabıl etiledi.

Qaraqalpaqstan Respublikası Joqarǵı Keńesiniń Málimleme xızmeti