Ájiniyaz atındaǵı Nókis mámleketlik pedagogikalıq institutında Malayziyanıń Lincoln University College oqıw ornı menen birgelikte shólkemlestirilgen qospa tálim baǵdarlamasınıń bas koordinatorı, professor Rashid Abdusallam Abdullah hám professor Lubna Ali Muhammed penen ushırasıw bolıp ótti.

Ushırasıwǵa instituttıń ilimiy isler hám innovaciyalar boyınsha prorektorı R.Eshmuratov, social-gumanitar pánlerdi aralıqtan oqıtıw kafedrasınıń baslıǵı G.Qıdırbaeva, xalıqaralıq birge islesiw bóliminiń metodisti A.Bimbetov hám qospa tálim baǵdarlaması boyınsha mektepke shekemgi tálim baǵdarında oqıp atırǵan studentler qatnastı.

Ushırasıwda 2022-jılı eki joqarı oqıw ornı arasında dúzilgen shártnama tiykarında mektepke shekemgi tálim baǵdarı boyınsha qospa tálim baǵdarlamasınıń ekinshi basqıshı – 2 jıl Malayziyanıń Lincoln University College oqıw ornında institut studentleriniń oqıw procesin shólkemlestiriw máselesi dodalandı.

Óz gezeginde, qospa tálim baǵdarlamasınıń bas koordinatorı, professor Rashid Abdusallam Abdullah Lincoln University College oqıw ornında sırt elli studentler ushın jaratılǵan sharayatlar, ol jerde oqıwdıń abzallıqları, oqıw laboratoriyaları hám basqa da qolaylıqları haqqında maǵlıwmat berdi.

Ilaj sońında aldaǵı waqıtta birgelikte ámelge asırılatuǵın jumıslar belgilep alındı.

NMPI baspasóz xızmeti.