Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipov Qaraqalpaqstan Respublikasına xızmet saparı sheńberinde Berdaq atındaǵı Qaraqalpaq mámleketlik universitetinde Qaraqalpaqstan Respublikasındaǵı barlıq joqarı oqıw orınlarınıń basshıları menen ushırastı. Bul haqqında QMU baspasóz xızmeti xabar berdi.

Ilajǵa joqarı oqıw orınlarınıń rektorları hám filiallardıń direktorları, prorektorlar sonday-aq, juwaplı xızmetkerler qatnastı. Ushırasıwdı Qaraqalpaqstan Respublikası Joqarı bilimlendiriw, ilim hám innovaciyalar ministri B.Qayıpbergenov alıp bardı.

Dáslep Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipov sózge shıǵıp, máleketimizde sońǵı jılları bilimlendiriw tarawına qaratılıp atırǵan itibar nátiyjesinde tarawdıń materiallıq-texnikalıq bazasınıń bekkemleniwi, sonday-aq, oqıtıwshılar hám ustazlarǵa múnásip miynet sharayatların jaratıwǵa ayrıqsha itibar qaratılıp atırǵanlıǵın atap ótti.

Ilajda barlıq joqarı oqıw orınları basshılarına jańa oqıw jılın joqarı dárejede baslaw, oqıw processin durıs shólkemlestiriw, studentlerdi turaq jay menen támiyinlew, bul baǵdarda jol qoyılıp atırǵan kemshiliklerdi saplastırıw hám aldaǵı ámelge asırılıwı tiyis bolǵan wazıypalar boyınsha birqatar tapsırmalar berildi.