«Prezidentimiz benen ushırasıw mende úlken tásir qaldırdı», – deydi NMPI studenti, jas shayır Abdiraxman Qoylıbaev
Men Kegeyli rayonındaǵı «Júzimbaǵ» awıl puqaralar jıyınında turaman. Házirgi kúnde Ájiniyaz atındaǵı Nókis mámleketlik pedagogikalıq institutınıń sırtqı bólimi qaraqalpaq tili hám ádebiyatı tálim baǵdarınıń 4-kurs studentimen. Usı kúnge shekem «Mánzilsiz xatlar» hám «Seni joytaman» atamasındaǵı qosıqlar toplamım shıqtı. Sonday-aq, Respublikalıq jas dóretiwshilerdiń Zamin seminarınıń 2022-jılǵı qatnasıwshısıman. 2023-jılı «Tolǵanıs pasılı» atamasındaǵı qosıqlar toplamım Ózbekstan Jazıwshılar awqamınıń «Birinshi kitabım» joybarı tiykarında 5000 nusqada baspadan shıqtı. Bul mámleketimizde dóretiwshilik penen shuǵıllanıwshı bizdey jaslardı qollap-quwatlaw ushın jaratılǵan imkaniyatlardıń bir kórinisi esaplanadı.
Elimizde jaslardı qollap-quwatlaw, olarǵa oqıwda, sportta, isbilermenlik penen shuǵıllanıp óz bizneslerin jolǵa qoyıw hám hár qanday tarawda jetiskenliklerge erisiwinde barlıq imkaniyatlar jaratılmaqta. Sonday-aq, kem támiyinlengen hám ata-analarınan ayırılǵan jaslar ushın shólkemlestirilgen «Jaslar dápteri»nde dizimde turǵan jaslar ushın da kóplegen járdemler berilip, olar turaq jaylar menen támiyinlenip atırǵanlıǵı da Prezidentimizdiń atalarsha ǵamqorlıǵı tiykarında ámelge asırılmaqta. Ásirese, joqarı oqıw orınlarına tapsırǵan abiturentlerge qosımsha kvotalardıń beriliwi de respublika jasları ushın quwanıshlı demlerdi inám etip, bilim alıwı ushın imkaniyatlar esiklerin ashpaqta.
Húrmetli Prezidentimizdiń 19-20-avgust kúngi elimizge bolǵan saparı dawamında el basshımız benen ushırasıw birqatar jaslar qatarında maǵan da nesip etti. Prezidentimizdiń biz jaslar menen bolǵan sáwbeti mende ózgeshe tásir qaldırdı. Hár birimizge bolǵan itibarı, jaǵdayımız benen qızıǵıwı bolsa, óz aldına bir quwanısh. Gúzde úyleniwge tayarlanıp atırman degen waqtımda Prezidentimiz «toyıń Jaslar isleri agentligi esabınan ótkerilip beriledi hám toyıńa Prezident sawǵası keledi», – degeni kútilmegen quwanıshlı waqıya boldı. Haqıyqatında da, men bunday bolıwın kútpegen edim. Prezidentimizdiń biz jaslarǵa degen itibarınan sheksiz minnetdarman hám aldaǵı waqıtları bul isenimdi elimizdiń rawajlanıwı jolında óz úlesim menen aqlawǵa háreket etemen.
Abdiraxman Qoylıbaev,
Kegeyli rayonı «Júzimbaǵ» awıl puqaralar jıyını.