Búgin, 28-avgust kúni Ájiniyaz atındaǵı Nókis mámleketlik pedagogikalıq institutı Keńesiniń 2024-2025-oqıw jılındaǵı dáslepki májilisi bolıp ótti.

Májilisti institut rektorı wazıypasın waqıtsha atqarıwshısı Quvondiq Qodirov basqarıp bardı.

Quvondiq Ayitbaevich dáslep Keńes aǵzaların eń ullı, eń áziz bayram – mámleketimiz ǵárezsizliginiń 33 jıllıǵı, sonıń menen birge, jańa oqıw jılınıń baslanıwı menen qutlıqladı hám májilis kún tártibindegi máseleler haqqında maǵlıwmat berdi.

Májilis kún tártibine muwapıq institut Keńesi jumıslarınıń 2024-2025-oqıw jılı ushın kalendarlıq is jobasın tastıyıqlaw, Keńes aǵzaları quramına ózgerisler kirgiziw, Ózbekstan Respublikası ǵárezsizliginiń 33 jıllıǵına tayarlıq kóriw hám Ǵárezsizlik sabaqların shólkemlestiriw, kafedralardıń jańa oqıw jılına tayarlıǵı, Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Joqarı, orta arnawlı hám professional bilimlendiriw baǵdarları boyınsha oqıw-metodikalıq birlespeler xızmetin Muwapıqlastırıwshı keńesine oqıw ádebiyatların usınıw, ilimiy ataqlarǵa talaban institut professor-oqıtıwshılarınıń hújjetlerin Joqarı attestaciyalıq komissiyasına usınıw sıyaqlı tiykarǵı, sonday-aq, jańa oqıw jılı ushın Ózbekstan Respublikası Prezidenti mámleketlik stipendiyası hám ataqlı mámleketlik stipendiyalarǵa talabanlardı respublikalıq basqıshqa usınıw hám institut kólemindegi Ájiniyaz Qosıbay ulı stipendiyasın tastıyıqlaw sıyaqlı aǵımdaǵı máseleler boyınsha tiyisli juwapkerlerdiń bayanatları tıńlandı.

Kórip shıǵılǵan máseleler boyınsha tiyisli qararlar qabıl etildi.

Keńes májilisinde Joqarı attestaciyalıq komissiyası tárepinen professor, docent ilimiy ataqları tastıyıqlanǵan professor-oqıtıwshılarǵa attestatları, sonıń menen birge, ilim doktorı (DSc) hám filosofiya doktorı (PhD) ilimiy dárejeleri tastıyıqlanǵan professor-oqıtıwshılardıń diplomları tapsırıldı.

NMPI baspasóz xızmeti.