Búgin, 29-avgust kúni Ájiniyaz atındaǵı Nókis mámleketlik pedagogikalıq institutınıń eki mıń orınlıq jańa oqıw imaratınıń saltanatlı ashılıwına arnalǵan «Sen teberik dárgayısań bilimniń!» atamasındaǵı ilaj bolıp ótti.

Ilajǵa Qaraqalpaqstan Respublikası Joqarǵı Keńesi hám Ministrler Keńesi, Joqarı bilimlendiriw, ilim hám innovaciyalar ministrligi, respublikamızdaǵı joqarı oqıw orınları, mákeme-shólkemlerdiń juwapkerleri, elimizdiń belgili aǵartıwshı ziyalıları, instituttıń professor-oqıtıwshıları jáne miynet jámááti, keń jámiyetshilik hám ǵalaba xabar quralları wákilleri qatnastı.

Saltanatlı ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, qatnasıwshılardı elimiz boylap keń túrde belgilenip atırǵan Ózbekstan Respublikası mámleketlik ǵárezsizliginiń 33 jıllıǵı menen qutlıqladı.

«Bir bolsaq – bir xalıqpız, birlessek – Watanbız!» súreni tiykarında kóterińki ruwxta belgilenip atırǵan eń ullı, eń áziz bayram qarsańında elimizdegi tuńǵısh bilim dárgayı – Ájiniyaz atındaǵı Nókis mámleketlik pedagogikalıq institutı jańa oqıw imaratınıń paydalanıwǵa tapsırılıwı bayramǵa múnásip sawǵa bolǵanlıǵın atap ótti.

Bul oqıw ornı tek ǵana respublikamızda emes, sonıń menen birge, pútkil Oraylıq Aziya regionında óz ornına, bilimlendiriw tarawında óz qádiriyatlarına iye bolǵan dárgaylardıń biri bolıp tabıladı. Búgingi kúnge shekem institut pitkeriwshileri arasınan 5 Ózbekstan Qaharmanı, 6 akademik, kóplegen mámleketlik hám jámiyetlik ǵayratkerler, bilimlendiriw hám xalıq xojalıǵınıń túrli tarawlarınıń pidayıları jetilisip shıqqanlıǵı pikirimizdiń ayqın dálili esaplanadı.

Mámleketimiz basshısınıń tikkeley itibarı hám ǵamqorlıǵı nátiyjesinde mámleketlik byudjet esabınan 76 milliard sum qarjı ajıratılıp, institut ushın 2 mıń orınlıq jańa oqıw imaratınıń qurıp pitkeriliwi hám paydalanıwǵa tapsırılıwı, sonıń menen birge, materiallıq-texnikalıq bazanı jetilistiriw maqsetinde oqıw imaratları rekonstrukciya islenip, jańadan laboratoriyalar, sport kompleksleri hám studentler turaq jaylarınıń qurılıp atırǵanı respublikamızdaǵı tuńǵısh bilim dárgayınıń 90 jıllıq torqalı toyına, sonıń menen birge, usı oqıw ornına atı berilgen ullı klassik shayırımız Ájiniyaz Qosıbay ulınıń 200 jıllıǵına múnásip sawǵa boldı.

Eki mıń orınǵa mólsherlengen jańa oqıw imaratında zamanagóy oqıw hám lekciya auditoriyaları, eń sońǵı texnika hám texnologiyalar menen úskenelengen laboratoriyalar, IT-inkubaciya, málimleme-resurs orayları, bıyılǵı oqıw jılınan baslap barlıq joqarı oqıw orınlarında engizilip atırǵan registrator ofisi hám basqa da kóplegen imkaniyatlar jaratılǵan.

– Búgingi kúnde institutımızda 17 mıńǵa shamalas studentler bilim alıp atırǵan bolıp, olardıń mámleketimizdiń jarqın keleshegi ushın xızmet etetuǵın, Úshinshi Renessanstıń tiykarın jaratatuǵın jetik kadrlar bolıp jetisiwi ushın usınday zamanagóy tipte qurıp pitkerilgen okıw imaratlarınıń, bunıń ishinde jaratılǵan sharayatlardıń áhmiyeti úlken. Sońǵı jıllarda mámleketimizde Prezidentimizdiń joqarı bilimlendiriwge qaratıp atırǵan itibarı nátiyjesinde institutımızdıń materiallıq-texnikalıq bazası jıldan-jılǵa jetilisip barmaqta. Bunıń ushın mámleketimiz basshısına alǵısımız sheksiz. Biz, álbette, bunday itibar hám ǵamqorlıqlardan ele de kúsh-jiger alıp, zamanagóy bilim hám kónlikpelerge iye bolǵan qánigelerdi jetilistirip shıǵarıwǵa bar imkaniyatımızdı sarplaymız, – deydi institut rektorı wazıypasın waqıtsha atqarıwshısı Quvondiq Qodirov.

Ilaj qatnasıwshıları jańa oqıw imaratında studentlerdiń bilim alıwı, ilimiy-izertlew jumısları menen shuǵıllanıwı, kónlikpelerin bekkemlewi ushın jaratılǵan sharayatlar menen tanıstı.

Ájiniyaz atındaǵı Nókis mámleketlik pedagogikalıq institutı baspasóz xızmeti.