Búgin, 19-sentyabr kúni Ájiniyaz atındaǵı Nókis mámleketlik pedagogikalıq institutında «Dekos» kompaniyası hám «MFaktor» joybarınıń tiykarın salıwshısı sıpatında xalqımızǵa belgili bolǵan isbilermen Hasan Mamasaidov penen ushırasıw bolıp ótti.

Ilajǵa institut administraciyası wákilleri, jaslar awqamı baslanǵısh shólkeminiń jetekshileri hám student-jaslar qatnastı.

Ushırasıwda institut rektorı wazıypasın waqıtsha atqarıwshısı Quvondiq Qodirov sózge shıǵıp, isbilermen Hasan Mamasaidov tárepinen ámelge asırılıp atırǵan joybarlar, olardıń áhmiyeti, sonday-aq, onıń «Biznes marafon» joybarında turaqlı túrde spikerlik etip, jaslar isbilermenligin rawajlandırıw baǵdarında islep atırǵan jumısları haqqında maǵlıwmatlar berdi hám miymanǵa húrmet kórsetip, qaraqalpaqsha shapan sawǵa etti.

Ushırasıw barısında isbilermen óziniń ómiri hám miynet jolı, isbilermenlikke qoyǵan dáslepki qádemi, jumıs procesinde jol qoyǵan kemshilikleri, ushıraǵan qıyınshılıqları, olardı qalay jeńip ótip, búgingidey dárejege eriskeni boyınsha ómirlik tájiriybesi menen bólisti.

Student-jaslar isbilermenniń baslamaları hám joybarları haqqında ózlerin qızıqtırǵan sorawlarǵa juwaplar aldı.

Eń jaqsı soraw iyelerine Hasan Mamasaidov óz avtorlıǵındaǵı «Bu kitob siz uchun emas, balki boʻlajak liderlar uchun…» atamasındaǵı kitabın sawǵa etti.

NMPI baspasóz xızmeti.