Kópshiligimiz kúndelikli turmısımızda mápler soqlıǵısıwı haqqında kóp esitkenbiz hám ayırım jaǵdaylarda usınday jaǵdaylarǵa da dus kelgenbiz. Bul jámiyetke úlken zıyan jetkeretuǵın illetlerdiń biri bolıp, ol bolǵan jerde rawajlanıw bolmaydı, ádilsizlikler júz beredi, óz ara isenim sónedi, qánigelerdiń potencialı júzege shıqpaydı.

Ájiniyaz atındaǵı Nókis mámleketlik pedagogikalıq institutında korrupciyaǵa qarsı gúresiw «Komplaens qadaǵalaw» sistemasın basqarıw bólimi tárepinen shólkemlestirilgen seminarda mine usı illettiń zıyanlı aqıbetleri, oǵan qarsı gúresiw baǵdarında ámelge asırılıp atırǵan jumıslar dodalandı.

Ilajǵa institut professor-oqıtıwshıları, bólimlerde isleytuǵın qánigeler hám student-jaslar qatnastı.

Seminarda Qaraqalpaqstan Respublikası Ádillik ministrliginiń huqıqıy málimleme sektorı baslıǵı Nuriya Berdiniyazova, instituttıń aǵa yuristkonsultı Baxtıgúl Arzievalar sózge shıǵıp, mápler soqlıǵısıwı – bul adamnıń tikkeley yamasa tikkeley bolmaǵan jeke mápi xızmet wazıypaların obyektiv hám qalıs orınlawǵa tásir etetuǵın jaǵday ekenligi, buǵan óz waqtında qarsı keskin gúres alıp barılsa, yaǵnıy mápler soqlıǵısıwına jol qoyılmasa, korrupciyanıń da júz bermeytuǵınlıǵı, barlıq tarawlarda rawajlanıwlar bolatuǵınlıǵın atap ótti.

Mámleketlik xızmetkerlerdiń máplerine qayshı keletuǵın yamasa qayshı keliwi múmkin bolǵan mápler haqqında xabar beriw ámeliyatınıń jolǵa qoyılmaǵanlıǵı, mámleketlik shólkemlerde mápler soqlıǵısıwınıń aldın alıw, olardı anıqlaw hám tártipke salıwdıń nátiyjeli huqıqıy mexanizmi bolmaǵanı bul baǵdardaǵı nızamshılıqtı jetilistiriwge zárúrlikti júzege shıǵardı.

Prezidentimiz tárepinen usı jıldıń 5-iyun kúni tastıyıqlanǵan «Mápler soqlıǵısıwı haqqında»ǵı Nızam tiykarında mápler soqlıǵısıwınıń aldın alıw hám tártipke salıwdıń anıq tártibi belgilendi. Eń áhmiyetlisi, usı hújjet tiykarında mápler soqlıǵısıwın óz waqtında anıqlaw hám bunday jaǵdaydıń aldın alıwǵa baǵdarlanǵan eki túri, yaǵnıy xabarnama hám deklaraciya beriw mexanizmleri bekkemlep qoyıldı.

Bul Nızam mámleketlik shólkemlerde mápler soqlıǵısıwınıń aldın alıw, anıqlaw hám tártipke salıwdıń nátiyjeli mexanizmlerin engiziw, onıń huqıqıy aqıbetlerin anıq belgilew hám mámleketimizdiń korrupciyaǵa baylanıslı xalıqaralıq reytingdegi kórsetkishlerin arttırıwǵa xızmet etedi.

Seminarda qatnasıwshılar ózlerin qızıqtırǵan sorawlarǵa qánigelerden tolıq juwaplar aldı.

Institutta usı Nızamnıń mazmunı hám áhmiyetin túsindiriwge baǵdarlanǵan úgit-násiyat jumısları dawam etpekte.

NMPI baspasóz xızmeti.