Usı jıldıń 24-sentyabr kúni Ájiniyaz atındaǵı Nókis mámleketlik pedagogikalıq institutında ilimiy hám innovaciyalıq ideyalar, joybarlar, sonday-aq, baslamaları bolǵan (prototipleri islep shıǵılǵan, joybar prezentaciyası qáliplestirilgen) 30 jasqa shekemgi jaslar arasında «TechnoWays» texnologiyalıq rawajlanıw marafonınıń institut basqıshı bolıp ótti.

Marafon qatnasıwshılarınıń joybarları 2 túrli kategoriyada – baǵdarlamalıq támiynat hám texnologiyalıq sheshim baǵdarları boyınsha kórip shıǵıldı.

Marafonda joybarlar ilimiy hám innovaciyalıq jańalıǵı, joybar prototipiniń engiziwge tayarlıq dárejesi, ámeldegi analoglarınan abzallıǵı, joybardı ámelge asırıwdan kútilip atırǵan nátiyjeler, joybar prezentaciyasınıń puqtalıǵı sıyaqlı kriteriyalar tiykarında komissiya aǵzaları tárepinen bahalandı.

Esletip ótemiz, marafon juwmaqlarına muwapıq komissiya aǵzaları tárepinen bahalar ulıwmalastırılǵan halda eń joqarı nátiyjege iye bolǵan 1-, 2-, 3-orınlardı iyelegen qatnasıwshılar Marafon jeńimpazı dep tabıladı hám usı jıldıń 8-11-oktyabr kúnleri Nókis qalasında ótkeriletuǵın respublikalıq basqıshqa jollama beriledi.

NMPI baspasóz xızmeti.