Búgin, 25-sentyabr kúni Ájiniyaz atındaǵı Nókis mámleketlik pedagogikalıq institutı málimleme-resurs orayında qazaq xalqınıń ataqlı shayırı hám jazıwshısı, belgili dramaturgi jáne mámleketlik ǵayratkeri Sáken Seyfullinniń tuwılǵanına 130 jıl tolıwına arnalǵan «Aqındardıń aq suńqarı» atamasındaǵı ádebiy keshe bolıp ótti.

Kesheni málimleme-resurs orayı sırt el málimleme-kitapxana resursları menen islesiw bóliminiń baslıǵı Rita Amanbaeva basqarıp bardı.

Ilajǵa Qaraqalpaqstan Respublikası Málimleme-kitapxana orayı ulıwma oqıw zalı sektorınıń baslıǵı Bolǵanay Óteniyazova, huqıqıy maǵlıwmatlar sektorınıń baslıǵı N.Jumaniyazova, instituttıń qazaq tili hám ádebiyatı kafedrasınıń baslıǵı, docent Írıstı Quttımuratova, málimleme-resurs orayı bibliografı Ziyada Áwezova, sonday-aq, student-jaslar qatnastı.

Ádebiy keshede sózge shıqqanlar qazaq ádebiyatınıń iri tulǵalarınıń biri, sonday-aq, Qazaqstan Xalıq komissarları Keńesiniń birinshi baslıǵı bolǵan Sáken Seyfullinniń ómiri hám dóretiwshiligi, onıń shıǵarmalarınıń tek ǵana qazaq ádebiyatı emes, sonıń menen birge, túrkiy xalıqlar hám dúnya ádebiyatında tutqan ornı, atap aytqanda, proza, dramaturgiya, ádebiy sın, ádebiyattanıw tarawlarında etken jemisli miynetleri haqqında maǵlıwmatlar berdi.

Keshe instituttıń qazaq tili hám ádebiyatı tálim baǵdarınıń studentleri tárepinen shólkemlestirilgen ádebiy bólim menen dawam etti. Onda túrkmen tili hám ádebiyatı, sonday-aq, muzıkalıq tálim baǵdarlarınıń studentleri de qatnasıp, óz ónerlerin kórsetti.

NMPI baspasóz xızmeti.