Búgin, 27-sentyabr kúni Ájiniyaz atındaǵı Nókis mámleketlik pedagogikalıq institutında Qaraqalpaqstan xalıq jazıwshısı, Berdaq atındaǵı mámleketlik sıylıqtıń laureatı Karamatdin Sultanovtıń tuwılǵanına 100 jıl tolıwına arnalǵan «Aqdáryadan ilhamlanǵan kórkem sóz sheberi» atamasındaǵı respublikalıq ilimiy-ámeliy konferenciya bolıp ótti.

Ilajǵa Qaraqalpaqstan Respublikası Jazıwshılar awqamı, Ózbekstan Ilimler Akademiyası Qaraqalpaqstan bóliminen wákiller, jazıwshınıń perzentleri hám shańaraq aǵzaları, belgili jazıwshı hám shayırlar, institut professor-oqıtıwshıları, student-jaslar, sonday-aq, ǵalaba xabar qurallarınıń wákilleri qatnastı.

Konferenciyanı institut rektorı wazıypasın waqıtsha atqarıwshısı Quvondiq Qodirov kiris sózi menen ashıp berip, jazıwshı Karamatdin Sultanovtıń qaraqalpaq ádebiyatı tariyxında tutqan ornı ayrıqsha ekenligin atap ótti.

Karamatdin Sultanov 1924-jılı 5-sentyabrde Moynaq rayonınıń «Aqdárya» awılında dúnyaǵa kelgen.

Ol miynet jolı dawamında jurnalistlik xızmet penen bir qatarda kórkem dóretiwshilik penen de shuǵıllanıp, ótken ásirdiń 60-jıllarında kórkem publicistika, poeziya, proza tarawlarında qálem terbetken úlken talant iyesi sıpatında jurtshılıqqa belgili bola basladı. Karamatdin Sultanov derlik yarım ásir dawamında tınbay dóretiwshilik penen shuǵıllanıp, xalqımızǵa óziniń «Waqıt qosıqları», «Dáwir táriypi», «Altın dáwir», «Mádeli», «Aldınǵı sawınshı», «Meniń doslarım», «Awıllaslarım», «Aǵalardıń áńgimesi», «Ótken kúnler» sıyaqlı birqansha qosıqlar, ocherk hám gúrrińler, povestler toplamları menen bir qatarda «Aqdárya», «Ájiniyaz» romanları, sonday-aq, «Ómir dápteri» roman-memuarın inam etti.

Konferenciyada qaraqalpaq ádebiyatı kafedrasınıń docenti Mariya Bekbergenova, filologiya ilimleri boyınsha filosofiya doktorı (PhD) Ádilbay Seytbekov, qaraqalpaq tili kafedrasınıń docenti Biybisánem Yusupovalar Karamatdin Sultanovtıń ómiri hám dóretiwshiligi, prozada kórkem sóz sheberi obrazın jaratıwdaǵı ózgeshelikleri, jazıwshı shıǵarmalarında frazeologizmler boyınsha bayanatların oqıp esittirdi.

Ilaj instituttıń talantlı studentleri atqarıwındaǵı kórkem-ádebiy bólim menen dawam etti.

NMPI baspasóz xızmeti.