Ájiniyaz atındaǵı Nókis mámleketlik pedagogikalıq institutında 1-oktyabr – Muǵallimler hám ustazlar kúni múnásibeti menen bayram keshesi bolıp ótti.

Keshede instituttıń oqıw isleri boyınsha prorektorı wazıypasın waqıtsha atqarıwshısı A.Abdiev, ilimiy isler hám innovaciyalar boyınsha prorektorı R.Eshmuratov sózge shıǵıp, ilaj qatnasıwshıları bolǵan professor-oqıtıwshılar, pedagog xızmetkerler, bólimlerde isleytuǵın qánigeler hám student-jaslardı elimiz boylap keń túrde belgilenip atırǵan bayram menen qutlıqlap, mashaqatlı jumıslarında tabıslar tiledi.

Ilimiy-pedagogikalıq hám jámiyetlik jumıslarda belsendilik kórsetip, óz lawazımlıq wazıypaların shın júrekten, pidayılıq penen atqarıp kiyatırǵan bir topar professor-oqıtıwshılar hám qánigelerge bayram sawǵaları tapsırıldı, sonday-aq, Ózbekstan Respublikası Joqarı bilimlendiriw, ilim hám innovaciyalar ministriniń tiyisli buyrıǵı menen «Joqarı bilimlendiriw aǵlası» kókirek belgisi menen sıylıqlanǵan professor-oqıtıwshılar saltanatlı túrde sıylıqlandı.

Bayram keshesi instituttıń «Tumaris» xalıq ansambli hám talantlı studentleriniń atqarıwındaǵı koncert baǵdarlaması menen dawam etti.

NMPI baspasóz xızmeti.