Búgin, 30-sentyabr kúni Qaraqalpaqstan Respublikası Joqarǵı Keńesinde Muǵallimler hám ustazlar kúni múnásibeti menen elimizdiń rawajlanıwı, ǵárezsizligimizdi ele de bekkemlew, nawqıran hám bilimli jas áwladtı tárbiyalaw jolında jemisli miynet etip atırǵan birqatar watanlaslarımızdı sıylıqlaw máresimi bolıp ótti.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, Muǵallimler hám ustazlar kúni múnásibeti menen jıynalǵanlardı qutlıqladı hám húrmetli Prezidentimiz basshılıǵında elimizde ámelge asırılıp atırǵan keń kólemli iygilikli baslamalar hám bilimlendiriw sistemasın rawajlanǵan mámleketlerdiń tájiriybeleri tiykarında reformalaw, muǵallimler hám ustazlardıń jámiyettegi ornın bekkemlew baǵdarındaǵı jumıslar haqqında keń túrde atap ótti.

Itibarlısı, Qaraqalpaqstan Respublikası Joqarǵı Keńesi Prezidiumınıń tiyisli qararı tiykarında elimizdi hár tárepleme rawajlandırıw hám xalqımızdıń abadan turmısın támiyinlew jolındaǵı pidákerli miynetleri, jas áwladtı Watandı súyiwshilik hám ǵárezsizlik ideyalarına sadıqlıq ruwxında tárbiyalaw hámde olardı nawqıran, bilimli jaslar etip kamalǵa keltiriw jolındaǵı belsendiligi ushın Ájiniyaz atındaǵı Nókis mámleketlik pedagogikalıq institutı oqıw-metodikalıq basqarmasınıń bas qánigesi, matematikanı oqıtıw metodikası kafedrasınıń aǵa oqıtıwshısı Jeńisbay Jumamuratov «Ardaqlı nuranıy» kókirek belgisi menen, sonday-aq, institutımız magistrantı Islam Dilmanov «Úmit ushqını» kókirek belgisi menen sıylıqlandı.

Institut rektoratı hám miynet jámááti atınan pidayı ustaz Jeńisbay Jumamuratovtı hám úmitli magistrantımız Islam Dilmanovtı shın júrekten qutlıqlaymız!

NMPI baspasóz xızmeti.