Usı jıldıń 27-sentyabr kúni Túrkiya Respublikasınıń Ankara qalasındaǵı Hajı Bayram Veli universitetinde Túrkiy xalıqlar Akademiyasınıń baslaması menen basıp shıǵarılǵan «Qaraqalpaq shayırı Ájiniyaz Qosıbay ulı» kitabınıń prezentaciya keshesi bolıp ótti. Bul haqqında Berdaq atındaǵı Qaraqalpaq mámleketlik universiteti jurnalistika kafedrasınıń docenti Baxıtbay Palwanov málim etti.

Keshege Túrkiy Akademiyanıń prezidenti Shaxin Mustafaev, Hajı Bayram Veli universitetiniń rektorı Mehmed Nadji Bostanji, sonday-aq, tuwısqan túrkiy ellerdiń diplomatiyalıq wákilleri hám ilimpazları qatnastı.

«Óz shıǵarmalarında túrkiy xalıqlardıń birligin jırlaǵan kórnekli shayır Ájiniyazdıń 200 jıllıǵı qarsańında onıń doretiwshiligin jańlatıwǵa úles qosqanımızdan quwanıshlımız, – dedi akademik Shaxin Mustafaev óz shıǵıp sóylewinde. – Qaraqalpaqstanda dúnyaǵa kelgen Ájiniyaz tek jergilikli shayır ǵana emes, arab, parsı, qazaq jáne túrkmen tillerin jetik meńgergen oyshıl, lingvist bolǵan. Ol óz shıǵarmalarında túrkiy xalıqlardıń ortaq mádeniy birligin jırlaǵan. Endi onıń dóretpeleri Túrkiy Akademiyanıń awdarması menen túrk kitap oqıwshılarına jol ashıp otır».

Hajı Bayram Veli universitetiniń rektorı Mehmed Nadji Bostanji bolsa Ájiniyaz Qosıbay ulınıń adamzat tariyxınıń waqıyaları hám ortaq geografiyamızdı jaqınlastıratuǵın bahalılıqları tuwralı qosıqlarǵa iye ullı shayır ekenin atap ótti. Onıń bildiriwinshe, Ájiniyaz shayır pútkil túrkiy xalıqlar dúnyasına belgili bolıwǵa ılayıq.

Keshege Qaraqalpaq mámleketlik universiteti professorı, filologiya ilimleriniń doktorı Quwanıshbay Orazımbetov ta qatnastı hám shıǵıp sóyledi. Ilajda kitaptı tayarlawǵa úlken úles qosqan Hajı Bayram Veli universitetiniń oqıtıwshısı, docent Xuseyn Yıldırım, Qaraqalpaq mámleketlik universiteti professorı Quwanıshbay Orazımbetov, Ázerbayjandaǵı Atatúrk orayınıń prezidenti, professor Nizami Jafarovlar shıǵıp sóylep, shayır Ájiniyaz Qosıbay ulınıń ómiri menen dóretiwshiligi haqqında maǵlıwmatlar berdi.

Keshede Ájiniyaz Qosıbay ulınıń qosıqları oqıldı.