Ájiniyaz atındaǵı Nókis mámleketlik pedagogikalıq institutında jaslar arasında náshebentlik hám psixotrop zatlardan paydalanıwdıń aldın alıw, AIJS hám AIV infekciyasına qarsı gúresiw, jınayatshılıq hám huqıqbuzarlıqlar profilaktikasına arnalǵan ushırasıw bolıp ótti.

Ilajǵa Qaraqalpaqstan Respublikası AIJSke qarsı gúresiw orayı shıpakeri D.Taxirova, instituttıń zoologiya, adam morfofiziologiyası hám onı oqıtıw metodikası kafedrasınıń oqıtıwshısı G.Palwanova, sonday-aq, Qaraqalpaqstan Respublikası Ishki isler ministrligi Jınayat-izlew basqarması náshebentlikke qarsı gúresiw bólimi aǵa operativ wákili R.Qallibekov, dekan orınbasarları hám studentler qatnastı.

Ushırasıwda taraw wákilleriniń atap ótiwinshe, házirgi waqıtta respublikamız boylap náshebentlik hám psixotrop zatlardıń sawdası menen baylanıslı jınayatlardıń aldın alıw boyınsha tiyisli jumıslar alıp barılıp atırǵanına qaramastan, tilekke qarsı, bunday jınayatlarda jaslardıń qatnasıw jaǵdayları da ushırasıp turıptı. Bul bolsa usı baǵdardaǵı profilaktikalıq jumıslardı ele de kúsheytiwdi talap etpekte.

Házirgi waqıtta ayrım jaslar arasında náshebentlik zatlar, sonday-aq, quramında psixotrop zatlar bolǵan dárilerdi bilip-bilmey qabıllap, keyin ala olarǵa úyrenip qalıp atırǵan jaǵdaylar ushırasıp turıptı. Ásirese, óz úylerinen, ata-anasınan uzaqta, kvartirada jasap atırǵan studentler arasında bunday jaǵdaylardı boldırmaw kúnniń baslı wazıypalarınıń birinen bolıp tabıladı.

Bunday zıyanlı zatlar respublikamızǵa nızamǵa qayshı aylanba jollar arqalı kirip kelip atırǵanı, sonıń menen birge, internet tarmaqları arqalı nızamsız sawdalarınıń bolıp atırǵanı, jaslardıń olardan saqlanıwı boyınsha profilaktikalıq kónlikpeler berildi.

Ásirese, bunda eń dáslep hár bir studenttiń psixologiyalıq jaǵdayın jaqsılap, náshebentlik hám psixotrop zatlar haqqındaǵı bilimlerin arttırıw, bul arqalı olarda usı zatlardıń zıyanlı aqıbetleri haqqında túsinik jáne oǵan qarsı psixologiyalıq immunitet payda etiw bunday illetlerge qarsı gúresiwdegi eń nátiyjeli jol ekenligi atap ótildi.

Sonday-aq, jaslar arasında AIJS hám AIV infekciyasına shatılıw jaǵdaylarınıń aldın alıw boyınsha ámelge asırılıp atırǵan jumıslar haqqında da maǵlıwmatlar berilip, jaslarǵa bul illetten awlaq júriw, óz salamatlıǵın qorǵaw ushın nelerge áhmiyet qaratılıwı kerek ekenligi túsindirildi.

Taraw qánigeleri tárepinen jaslardıń náshebentlik hám psixotrop zatlarǵa úyrenip qalıwına biologiyalıq, psixologiyalıq hám sociallıq faktorlar tásir etip atırǵanı, olarǵa qarsı gúresiw baǵdarında alıp barılıp atırǵan jumıslar haqqında maǵlıwmatlar berildi.

NMPI baspasóz xızmeti.