XIX ásirdegi qaraqalpaq ádebiyatınıń klassikalıq wákili Ájiniyaz Qosıbay ulınıń qosıqları Túrkiya Respublikası Stambul qalasındaǵı Túrk Akademiyası professorı Huseyn Yıldırım tárepinen túrk tiline awdarılıp, «Qaraqalpaq shayırı Ájiniyaz Qosıbay ulı» atamasında kitap bolıp basıp shıǵarılǵanı hám keń jámiyetshilikke tanıstırılǵanı haqqında xabar bergen edik.

Ájiniyaz atındaǵı Nókis mámleketlik pedagogikalıq institutında usı kitaptıń prezentaciya keshesi shólkemlestirildi.

Ilajǵa Berdaq atındaǵı Qaraqalpaq mámleketlik universiteti qaraqalpaq ádebiyatı kafedrasınıń professorı, filologiya ilimleriniń doktorı Quwanıshbay Orazımbetov, Ózbekstan Respublikasına miyneti sińgen mádeniyat xızmetkeri, Ájiniyaztanıwshı ilimpaz, belgili shayır Baxtiyar Genjemuratov, talantlı shayır, pedagog hám ilimpaz Túrkmenbay Jiyemuratov, instituttıń Túrkiy tiller fakulteti professor-oqıtıwshıları hám studentler qatnastı.

Ilajda sózge shıqqanlar, elimizde hám xalıqaralıq kólemde belgilenip atırǵan Ájiniyaz babamızdıń 200 jıllıǵı, onıń ómiri hám dóretiwshiligi, shıǵarmalarınıń tek ǵana qaraqalpaq ádebiyatı emes, sonıń menen birge, túrkiy xalıqlar hám dúnya ádebiyatında tutqan ornı haqqında maǵlıwmatlar berdi.

Sonday-aq, shayırdıń shıǵarmaların shet tillerine awdarıw arqalı onı dúnya xalıqlarına tanıstırıw baǵdarında ámelge asırılıp atırǵan jumıslarǵa toqtalıp, Túrk Akademiyası professorı Huseyn Yıldırım tárepinen Ájiniyaz Qosıbay ulınıń shıǵarmalarınıń túrk tiline awdarılıp, óz aldına kitap bolıp shıǵıwı ádebiyatımız tariyxındaǵı úlken jańalıq bolǵanlıǵın atap ótti.

NMPI baspasóz xızmeti.