Ájiniyaz atındaǵı Nókis mámleketlik pedagogikalıq institutı Shet tilleri fakulteti inglis tili hám ádebiyatı kafedrasınıń baslaması menen XIX ásir qaraqalpaq ádebiyatınıń kórnekli wákili Ájiniyaz Qosıbay ulınıń tuwılǵanına 200 jıl tolıwına arnalǵan «Ayt sen Ájiniyazdıń qosıqlarınan» atamasındaǵı ádebiy keshe shólkemlestirildi.

Keshede inglis tili hám ádebiyatı kafedrasınıń baslıǵı Aliya Tajieva sózge shıǵıp, respublikamızda hám xalıqaralıq kólemde, sonıń menen birge, institutımızda ádebiyat bayramı sıpatında belgilenip atırǵan ilajlardıń áhmiyeti, kafedranıń professor-oqıtıwshıları tárepinen Ájiniyaz shayırdıń qosıqların inglis tiline awdarıw, sonıń menen birge, shayır dóretpeleri boyınsha ilimiy-izertlew jumısları da dawam ettirilip atırǵanın ayrıqsha atap ótti.

Xabarıńız bar, húrmetli Prezidentimizdiń baslaması menen xalqımızdıń súyikli shayırı Ájiniyazdıń 200 jıllıǵı YuNESKO sheńberinde xalıqaralıq kólemde belgilenetuǵın yubileyler qatarına kirgizilgen edi.

Bıyıl respublikamızda, sonıń menen birge, xalıqaralıq kólemde shayırdıń yubileyi keń túrde belgilenbekte.

Ádebiy keshede studentler tárepinen Ájiniyaz shayırdıń qosıqları qaraqalpaq hám inglis tillerinde atqarıldı. Sonıń menen birge, shayırdıń ómiri hám dóretiwshiligi haqqında qatnasıwshılar arasında qızıqlı viktorinalıq sorawlar oynalıp, durıs juwap bergenlerge kitaplar hám estelik sawǵaları tapsırıldı.

Ilajda institut kóleminde ótkerilip atırǵan «Ayt sen Ájiniyazdıń qosıqlarınan» atamasındaǵı videorolikler tańlawına qatnasıp atırǵan studentlerdiń dóretiwshilik jumısları jıynalǵanlar dıqqatına usınılıp, tóreshiler quramı tárepinen bahalandı.

Keshede talantlı studentler tárepinen Ájiniyazdıń Qız Meńesh penen aytısı, sonday-aq, shayır shıǵarmalarınan saxnalıq kórinisler kórsetildi hám nama qosıqlarına ayaq-oyınlar, jıraw hám baqsılardıń atqarıwındaǵı dástanlardan úzindiler qatnasıwshılardıń dıqqatına usınıldı.

Ilaj juwmaǵında kesheni shólkemlestiriwge belsene qatnasqan studentler xoshametlendi.

NMPI baspasóz xızmeti.