XIX ásir qaraqalpaq ádebiyatınıń kórnekli wákili, klassikalıq shayır Ájiniyaz Qosıbay ulınıń 200 jıllıǵına arnalǵan ilajlar respublikamız boylap kóterińki ruwxta keń túrde belgilenbekte.

Ájiniyaz atındaǵı Nókis mámleketlik pedagogikalıq institutı Mektepke shekemgi tálim fakulteti mektepke shekemgi tárbiya hám defektologiya kafedrasınıń docenti, pedagogika ilimleri boyınsha filosofiya doktorı (PhD) Jámiyla Bekmanovanıń shólkemlestiriwinde arnawlı pedagogika: logopediya tálim baǵdarınıń 3-kurs studentleri menen birgelikte «4+2» ámeliyat baǵdarlaması sheńberinde paytaxtımız Nókis qalasındaǵı 48-sanlı mektepke shekemgi bilimlendiriw shólkeminde ótkerilgen ádebiy keshe qatnasıwshılar hám keshe miymanlarına úlken zawıq baǵıshladı.

Keshede fakultet dekanı Muhabbat Allambergenova shıǵıp sóylep, húrmetli Prezidentimizdiń baslaması menen xalqımızdıń súyikli shayırı Ájiniyazdıń 200 jıllıǵı YuNESKO sheńberinde xalıqaralıq kólemde belgilenetuǵın yubileyler qatarına kirgizilgenligin atap ótti. Shayırdıń ómiri hám dóretiwshiligi, shıǵarmalarınıń tek ǵana qaraqalpaq ádebiyatı emes, sonıń menen birgelikte, ózbek, qazaq, túrkmen hám basqa da túrkiy xalıqlar jáne dúnya ádebiyatında tutqan ornı, XIX ásirdegi qaraqalpaq ádebiyatınıń rawajlanıwında Ájiniyaz dóretiwshiliginiń áhmiyeti, búgingi kúnde onıń shıǵarmalarınıń úyreniliwi hám keleshek áwladlarǵa jetkeriliwi sıyaqlı máseleler haqqında maǵlıwmatlar berdi.

Ilajda kafedra baslıqları G.Jumasheva hám A.Bekimbetova, Nókis qalalıq Mektepke shekemgi hám mektep bilimlendiriw bólimi metodisti S.Abadanovalar sózge shıǵıp, Ájiniyaz shayır dóretpeleriniń jaslar tárbiyasındaǵı áhmiyeti tuwralı pikirlerin bildirdi.

Keshe instituttıń arnawlı pedagogika: logopediya tálim baǵdarınıń 3-kurs studentleriniń ámeliyat dawamında baqsha tárbiyalanıwshıları menen birgelikte shólkemlestirilgen kórkem-ádebiy bólim menen dawam etti.

NMPI baspasóz xızmeti.