Áliysher Nawayı atındaǵı Tashkent mámleketlik ózbek tili hám ádebiyatı universitetinde XIX ásir qaraqalpaq ádebiyatınıń kórnekli wákili Ájiniyaz Qosıbay ulınıń 200 jıllıǵına arnalǵan «Ájiniyaz Qosıbay ulı ádebiy miyrasın úyreniwdiń áhmiyetli máseleleri» atamasındaǵı xalıqaralıq ilimiy-ámeliy konferenciya bolıp ótti.

Konferenciyanıń ashılıw plenar májilisinde Ózbekstan Jazıwshılar awqamı, Berdaq atındaǵı Qaraqalpaq mámleketlik universiteti, ál-Farabiy atındaǵı Qazaq Milliy universiteti Turan-Iran ilimiy-izertlew orayınıń wákilleri, professor-oqıtıwshılar hám belgili ilimpazlar menen bir qatarda, Ájiniyaz atındaǵı Nókis mámleketlik pedagogikalıq institutı Túrkiy tiller fakulteti qaraqalpaq ádebiyatı kafedrasınıń baslıǵı Sársen Qazaqbaev, kafedra docentleri Qoshqarbay Matimov hám Ádilbay Seytbekovlar da qatnastı.

Ilajda sózge shıqqanlar húrmetli Prezidentimizdiń baslaması menen xalqımızdıń súyikli shayırı Ájiniyazdıń 200 jıllıǵı YuNESKO sheńberinde xalıqaralıq kólemde belgilenetuǵın yubileyler qatarına kirgizilgenligin atap ótti.

Ásirese, 2024-jıl 16-iyuldaǵı «Belgili qaraqalpaq shayırı hám oyshılı Ájiniyaz Qosıbay ulı tuwılǵan kúniniń 200 jıllıǵın keńnen belgilew haqqında»ǵı qararı tiykarında respublikamız boylap shayırdıń qutlı yubiley jası barlıq orınlarda kóterińki ruwxta belgilenbekte.

Konferenciyada shayırdıń ómiri hám dóretiwshiligi, shıǵarmalarınıń tek ǵana qaraqalpaq ádebiyatı emes, sonıń menen birgelikte, ózbek, qazaq, túrkmen hám basqa da túrkiy xalıqlar jáne dúnya ádebiyatında tutqan ornı, XIX ásirdegi qaraqalpaq ádebiyatınıń rawajlanıwında Ájiniyaz dóretiwshiliginiń áhmiyeti, búgingi kúnde onıń shıǵarmalarınıń úyreniliwi hám keleshek áwladlarǵa jetkeriliwi sıyaqlı máseleler haqqında maǵlıwmatlar berildi.

NMPI baspasóz xızmeti.