Paytaxtımız Nókis qalasındaǵı «Aqquw» kompleksinde jaylasqan «Qaraúy»de Ózbekstan Respublikası Joqarı bilimlendiriw, ilim hám innovaciyalar ministrliginiń keńeytilgen Kollegiallıq jıynalısı bolıp ótti.

Ilajǵa ministrliktiń juwapkerleri, aymaqlıq basqamarlardıń basshıları, respublikalıq joqarı oqıw orınlarınıń rektorları hám direktorları qatnastı.

Kollegiallıq jıynalıstı ministr Qońıratbay Sharipov basqarıp bardı.

Jıynalısta aymaqlardı rawajlandırıw hám drayver noqatların belgilew, tarawlarda orın alıp atırǵan mashqalalarǵa sheshim tabıw, máhálleler, zárúr bolsa hár bir shańaraqtıń turmıs tárizine unamlı tásir ete alatuǵın ilimiy tiykarlanǵan qatnastı engiziwde joqarı oqıw orınları hám texnikumlar jámáátiniń ilimiy potencialı jáne ámeliy tájiriybesin keńnen engiziw máselelerine ayrıqsha dıqqat qaratıldı.

Usınday sistemalı qatnas hám ilimiy-ámeliy tájiriybeniń Qaraqalpaqstan Respublikasında baslanıwı da biykarǵa emes. Bul jıynalıs Qaraqalpaqstan Respublikası hám barlıq aymaqlardaǵı joqarı oqıw orınları menen texnikumlardıń jumısların jańa basqıshqa kóteriw, sociallıq-ekonomikalıq jaqtan rawajlandırıwdı bilimlendiriw hám innovaciyalar arqalı kúysheytiw ushın áhmiyetli qádem bolıwı kútilmekte.

Jıynalısta kún tártibindegi máseleler boyınsha juwapkerlerge tapsırmalar berilip, tiyisli qararlar qabıl etildi.

NMPI baspasóz xızmeti.